منتديات نور الأدب - في رحاب الملحون ــ مينة ــ

القصيدة الثانية : " مينة " للشاعر , عبد الجليل المصمودي
اللازمة : قولو ليامنة تهليل العثماني .....مينة يا مينة معاك شرع الله

*******
صيفت للغزال براتي
مرسولي مشى و سباتو
قرا لها حروف بياتي
طوات الكتاب و رماتو
قالت لو بصوم سناتي
بيا لا ظفر في حياتو
***
من ذا النهار لا يتصور في مكاني
ولي عندو ابكي انت وياه
بعد الوصول غير هجرتو بلعاني
هذا حال الزين من عشقو يرضاه
كليت بالجفا و هطل دمع عياني
و كتابي ارتمى و درت ليه عزاه
***
فالحين قلت لو يا مرسولي
اترك النواح وارجع ليها
و اشكي لها و كون فضولي
وانا بشارتك نعطيها
ابطر لا تكون ملولي
لابد حاجتي تقضيها
***
ولى لعند ولفي باخباري تاني
نقر في باب الدار صابها ترجاه
بعيون باكية و الدمع الطوفاني
و كتابي محلول في يدها تقراه
مرسول عاشقي قالت هذا جاني
أهلا بكتابو و تايبة لله
***
لله يا رسول حبيبي
وليلو يفرج نكدو
اشكي و قر لو بذنوبي
واعطيه للدلال يشدو
ويلا وتيت يستر عيبي
حاشا ما نخالف عهدو
***
يوم لتنين هو العهد يرجاني
و نقيمو فرحتنا على احسان رضاه
وفات لالة بعهدها تاني
قلبي من بعد الصدود صاب مناه
اختمت حلتي برقايق المعاني
المصمودي قال في بيات لغاه
***
قولو ليامنة تهليل العثماني
مينة يا مينة معاك شرع الله