شوف المسلم
 

ابكي يا عيني وغردي
راه الدنيا مهمومة
اشكي يا نفسي وفردي
لبيات المنغومة
شوف الدنيا تمشي باللور
وناس بالباطل متهومة
شوف الظالم يغصب ويجور
من شرو القلوب مكلومة
شوف العربي ديما محقور
قدرو باخس ما عندو سومة
شوف المسلم دمو مهدور
رايتو منكسة وخيامو مهدومة
شوف العالم عامر بشرور
شوف العراق وفلسطين المظلومة
شوف الجاهل ينطح كي الثور
والعارفين في حفرة مردومة
شوف الظلام يحارب النور
يعبد فالطريق الملغومة
شوف المسكين لاهث مضرور
يومو قاسي واحلامو محرومة
يشقى يتعب يجري ويدور
بين دوك لقوام المنعومة
يحلفو يمين يشهدو زور
يوعدوه بديموقراطية مزعومة
شوف الفقير سوقو مهجور
ومول الدينار الناس ليه رامو
شوف الحق جالس محقور
مهموم خايناه ايامو
شوف الباطل يمشي مغرور
فرحان يشالي بكمامو
شوف الصدق ضامي مقهور
ناكد غارق في تخمامو
شوف المنكر عالي منصور
زاهي يتخنتر في سلهامو .

رد: شوف المسلم
 

أخي الشاعر و الزجال الرائع حسن الحاجبي، مساء الخير

مهما قالو و شهدو زور
كلامهم مكسور
و الحق عند الله منصور
العربي ديما محكور
ف بلاد الغربة
اما للسجن مجرور
و لا ميت مغدور
و لا محاصر ف أرضو
و عاملين عليه سور
مول الدينار لي الناس ليه رامو
راجل ف صفة ذيب
عمر كرشو و خوا لخوه الجيب
المحنة فيه الله يجيب
كيف يحلى عليا و عليك سلامو

تسلم ايديك أخي و أستاذي حسن على روحك النقية و النظيفة
تحياتي و تقديري

رد: شوف المسلم
 

أميرة الزجل والأديبة المبدعة : ناجية عامر
أنا في غاية الإمتنان لك لهذه الإلتفاتة الرائعة , شكرا جزيلا لك على المبادرة الجميلة والتوقيع البهي الذي رصعها .
دمت مبدعة بكل المودة وكامل الإجلال .

رد: شوف المسلم
 

جميل هذا السجال الزجلي بينكما أستاذة ناجية و أستاذ حسن.
دمتما و دام لكما الإيمان و التقوى