سيدي بولامان
 

شايلاه أوبيك
آ سيدي بولامان
الزيارة مرفودة ليك
داوينا من لمحان
ناويين نسكنو فيك
جينا من كل مكان
***
هذا راكب سفينة
هذا يقرا قرآن
هذا في يدو مشموم
هذا حامل ميزان
هذا يكذب كذبة
ويرددها بلسان
هذا يجذب جذبة
ويكثر فالبهتان
***
أنا مزاوك فالعتبة
فرج عني هاذ الكربة
بغيت نجلس تحت القبة
ويولي عندي شان
***
ها العار آسيدي بربر
بغيت نقطع لذاك البر
جيتك محجب ومبخر
قاصدك طامع في لامان
جبت ليك غطى ودجاجة
طلبتك تقضي لي حاجة
فالحصانة كانتراجا
لبست ليها جميع الألوان
***
ميمون و ميرا والخابور
اللي ضرب لي نجذب ونطيح
فين ما دار الفلك ندور
بين دوك وهادوك نسيح
***
آسيدي بولامان
اللي زارك يسمان
تقطع فيه الهضرة
ويتقال ليه اللسان
كان برا داير حضرة
وشعارو طنان
يرتب كلامو ويوزنو
واليوم سكت يا حسرة
ورمانا في النسيان
فضحو الله ولعنو
وخزاه في كل مكان

رد: سيدي بولامان
 

الكلمة حكمة للفاهم
سماها ما يطلعها حد بالسلالم
والحكيم يفهمها ويفهم سرها
كيف يعرف الشامم سر النسايم
اللي تكلم على الاوليا فالمغرب
تكلم على العماد الي شاد البلاد
وتكلم على الروح الداخلانية
فكتاب المعاني لا خير يكون بلا نية
واللي دار النية فهم الكلمة والحكمة
وجعل المعنى في المغنى
امااللي ما عرفش حق الرجال
فيطيح تحت الرجلين
كلامك آ المعلم كلام روح ورياحين
ومنهاج زين
متعتينا بيه الله يمتعك
ويرفع قدرك فالدينا وفالدين

رد: سيدي بولامان
 

جوابك زادني فيك محبة
وكلامك للحكمة عنوان

شكرا لك على المرور والتوقيع البهي
مع خالص آيات المحبة والتقدير