منتديات نور الأدب - يااااذكري عاميــه .. ضياء الدين البري

السلام عليكم .. كلام من قلبي

يااااذكري عاميه

.....

يااااذكري عاميه
يازرعه فْ قلبي نار حاميه
ياشقـّه صفوفنا من يومك
يامختلّـه
ومحتلّـه
علي قلوبنا تعيش علّّه
ياعار مرسوم علي جبيني
ياعضة كلبه سعرانه
وحابسه الدم جوّانا
في نن العين قسمتيني
بقيت نصّين
ومرمطتي التاريخ في الطين
ياشاطبه وجودنا من نفسي
غزلتي خيوطنا من يأسي
محاوطاني
وسجناني في أوطاني
وبدّلتي في عنواني
ياعمياني بسواد ليلك
وحكماني فْ قيود ويلك
وفي جفوني رسمتي غيوم
ومن زرعك طرحتي سموم
تسرطنّي في مجري الدم
يا موشومه علي سنيني
ومفضوحه علي جبيني
وسكناني في نبض القلب
يجلابه الهموم والغم
يادبّاحه فْ ولادالعم
في جوّاتهم كما الشاردين
ياقبّـاحه وكلّك ظـلم
ملكتينا وطفحنا الهم
سلبتي الأرض وزيدتي النهب
وسوقتينا وقيدك صلب
زرعتي لـْـنا شوية لم
بيسقونا المرار والظلم
ومن يومها ورثـتـك عار
ومن يومك حكمنا الغلب
محدد فين زنازيني
وقبر الليل متاويني
مقيـّدني في أسفل غار
يا أحقر طيف
في أطهر أرض
يادبّاحه الجنين والعرض
تواجدك زييف
وفي حدودك يتوه الفرض
ودايما كنت انا باسأل
عرفت انّه شيطان أهبل
وعد بيكي ..
ونفـّذ أمر تكوينك
وفارضينك
وصاينينـك
بدم جدودنايسقوكي
ومن يومك ، بتأذيني
صحيح الحق في بنودك
مالوهشي مآل
رجوع لاجيء وإخوانه .!
مافيهشي منال
دا بعد الغربه والترحال
أكيد هايعود لأوطانه
وهاتذوقي المرار ألوان
ولو صدفه وجالهم يوم
ولاد الغوله والرعيان
وفهموا الأصل في المعني
هيلقوا الإسم بيأكد
بإن انتي غبار يصعد
شيطان يهمد
ونار تخمد
ياريت الغوله تسمعني
أكيد صورتك بتوجعنا
وجايلك ليل ملوهشي نْهار
وكل الخلق هاتزفـّك
ويتسابقوا علي ذُلـّك
لو الأمه في يوم هبّـت
هتلقي ولاد هنا شبّت
قلوب تكسن نسا ورجال
ورب الأقصي بيصونها
وصورة القدس في عيونها
ومتحدد في يوم طردك
دا كل الدنيا تشهدلك
بإن انتي بقيتي زوال
ولا وجودك هنا يطـوّل
ولاهافضل بطول عمري
أكون راجل في توب عيّـل
أشيل ذلّي علي ظهري
لأن انتي فْ ضميري خيال
عشان ربي أكيد في علاه
هايرزقنا بناس خايفاه
وبكره الجاي هانتحوّل
بأمر المولي هانفضك
وهانذلّك
هانسجن فيكي روح ذلّك
وهانحاسبك علي غرورك
وهابدرغلّي في حروفك
عشان يطرح بذور خوفك
ومن صمّم في أخد قرار
علشان يفرض هنا أمورك
وسلم أرضي للمحتال
لابد يعيش حياته فْ نار
يعيش اليوم أسير للتار
لأنك إنتي ياقاسيه
بطول العمر شايلك عار
وبكره تشوفي ياعاصيه
هانقضي ازاي علي وجودك
وراية الحق فوق عاليه
هانرفعها بسُنـّه وفرض
علي الأقصي هاتبقي منار

.....

أشكركم

وللجميع تحياتي