|
توقعات علماء الفلك في عصفورية نورالأدبستان للعام 2015
[align=justify]
لأننا متحضرون والتوقعات الفلكية آخر موضة لمساعدة حكوماتنا الرشيدة، ولأننا نحب أن نكون على الموضة ولا يقال عنا: ( démodé ) وبمناسبة العام الجديد يسرنا هنا في محطة عصفورية نورالأدبستان أن نستضيف الدكتور في علم الفلك والأبراج [/align] شمروخ المفقوس وللتنويه الدكتور شمروخ المفقوس حاصل على شهادة الدكتوراة بدرجة امتياز في علم الفلك والتنجيم من أهم جامعات بلاد الجان ، والدكتور مفقوس يرطن بعدة لغات من لغات الجان أثناء تنجيمه..تحاوره وتشاركه التنجيم عالمة الفلك والمندل والسحر الشعبي البوردو و النخبة التركواز الدكتورة ميمونة الفصعونة الملقبة بـ نوستراداموس عصفورية نور الأدبستان والعالم ..هذا وسيقوم الخبيران الفلكيان بإفادتنا حول أهم أحداث ومحطات عام 2015 ، عربستانياً وعالمياً .. ملاحظة يمكنكم الثقة بخلو منتجاتنا من دهن الخنزير وبعدم تلقينا نشرات جاهزة من مخابرات سلطة حكومتنا "عصفورية نورالأدبستان " لنقرأها على أنها توقعات.. إذا ترقبوا معنا أهم أحداث هذا العام يليه قراءة أبراجكم لعام 2015 :nic80: ....مرحبا دكتور شمروخ ، أمستعد أنت لبدء قراءة التوقعات ؟ معك يا صديقي شكراً Avec vous, mon ami Merci With you, my friend Thank you Mit dir, mein Freund Danke |
رد: توقعات علماء الفلك في عصفورية نورالأدبستان للعام 2015
أنا اسمي هون، فيقوني من نومتي الله لا يوفق شياطينهن قال شو عندهن لقاء عشان حضرة فخامته، هلق لشو اللقاء بنصاص الليالي ........ - شمروخ انت عالهوا والناس عم تسمعك..... - راحت المصاري يا شمروخ، لحق حالك يا زلمة وأنا في الطريق جاي لهون، في نجمة كانت عم تركض وراي وخبرتني معلومة راح تغير وجه الأرض والتاريخ. هي السنة مميزة ونوعية، راح ينتج فيه جهاز سيادة اللواء بكميات تجارية......هدا الجهاز الي بيحول الإيدز كفتة! فاكرينه ولا نسيتوه......قولوا معي وداعاً مرض الايدز وداعاً الفيروسات وداعاً الصدفية وداعاً كل الأمراض....... وداعاً للفول ! - ولشو كمان وداعاً للفول يا دكتور شمروخ! - يا خيتي ماش اكتشافنا الطبي الكبير بيحول الفيروسات صباع كفتة متل ما حكى العالم الكبير سيادة اللواء مخترع قانون الكفتة، يعني الشعب العربي راح يشبع كفتة، ودعوا الفول يا جماعة ودعوه إلى الأبد. - وشو خبرتك النجمة كمان يا دكتور شمروخ؟؟ - النجمة خبرتني، فوقتني، خبرتنيييي يا ليل يا عين، يا ليل يا عين " بربك ما بينفع أشارك بالعرب آيدول وحاكيه للننوس " - دخيلك ومين هد الننوس؟؟ قصدك نانسي عجرم؟؟ لا دخيلك، صوتك متل ضفدع مآخد حبوب هلوسة، أرجوك ما تتهور - يخرب بيتك شو ذوقك معدوم، خلينا بالنجوم أحسن........ النجمة كانت بتقول أن مهنة الطب "بح" من قواميس البشر! ومهنة التمريض والتخدير والصيدلة .........وكل شي له علاقة بالطب والدوا كمان " بح" - ولشو كل هد؟؟؟؟؟؟ مستحيل هالحكي يصير؟؟! - لك دخيلوا للذكى دخيلو دخيلوووووووووووووووووووووووو ما قلنا الحاج كفتة راح يحول كل الأمراض لصباع كفتة لك دخيلو للذكا راح نحول المستشفيات لمدارس ومعاهد وجامعات! بطل فيه مرضى يعني بطل فيه علاجات ومستشفيات........... - معقول لهالدرجة! - وأكتر من هيك راح يزيد عدد المتسولين من كتر الخير الي راح يفيض بهالبلاد! - وليه راح يزيدوا؟؟ - لك دخيلوا للمخ والمخيخ والغدة النخامية يا حضرة المذيعة... لك دخيلو للأعصاب ما قلنا مهنة الطب راح تلتغي! يعني كل الأطباء والصيادلة والعاملين بالقطاع الطبي ما حيلاقوا شغل راح يتسولوا عم بتشككي في حواري مع النجوم؟؟! - لا مش عم شكك، بس حاسة البهارات هالمرة زيادة شوي اعذرني أنا ماني متفاءلة! الواقع صعب يا دكتور - إذا منك مصدقة اسألي الدكتورة ميمونة، ودوقي بهارات على كيف كيفك! |
رد: توقعات علماء الفلك في عصفورية نورالأدبستان للعام 2015
شمروخ معكم من جديد ، لحين عودة دكتورة ميمونة مع توقعاتها الفلكية لعام 2015م ، مرحبا دكتور شمروخ؟؟
- مراحب خيتي، هلا فيكي وبجميع المشاهدين العرب - شو توقعاتك لعام 2015 غير الكفتة والكباب، عندك بشريات أو تحذيرات عم تحملها للشباب العربي في 2015م - بشريات يا خيتي بشريات، آلاف وملايين فرص العمل عم تتساقط كالأمطار على الشباب العربي، ما في حدا راح يموت من الجوع يا جماعة ليش الخوف؟؟؟ ربع الشعب راح يكون بأجهزة الأمن: الأمن الوطني، الأمن الوقائي، الأمن الغذائي، المخابرات الجوية، البرية ، البحرية، البرمائية، الأمن العام، أمن البلديات، أمن المؤسسات، الحرس الرئاسي، قوات التدخل، قوات حفظ النظام، ............. - والربع التاني راح يكون بالسجون، أكل ومرعى وقلة صنعة، بيآكل ببلاش وبيشرب ببلاش وكإنه بفندق 7 نجوم. - طب والنص التاني يا دكتور شمروخ! - نص النص التاني راح يكونوا بأوروبا هناك عايشين أحلى حياة بالدول الاسكندنافية، والنص التاني من النص التاني راح يغرقوا في البحر ويرتاحوا من قرف هالعيشة المرة! وبهيك بتكون مشاكل الشباب انحلت ب 2015 .... - بعد إذنك بنحاول الاتصال على دكتورة ميمونة............. - لتكون عم تحاكي النجمات هلق، وإنتي عم تقطعي الاتصال بينها وبين السماوات... |
رد: توقعات علماء الفلك في عصفورية نورالأدبستان للعام 2015
[align=justify]
جميل جميل دكتور شمروخ [/align]حدثنا عن توقعاتك لحكامنا الأدبستانيين العظماء عموماً ودون ذكر أسماء سمعنا أن جهاز الكفتة سيتمكن أيضاً من صنع أكسير الحياة حتى يستمر كل منهم بالحكم ألف عام على الأقل؟ بما أنك زرت بلاد الجان هل لديهم مثلنا حكّام عظماء وهل إسرائيلهم كإسرائيل التي تحتل أرضنا؟؟ سمعت أن الشعوب نور الأدبستانية قد يتحولون إلى آكلي لحوم البشر، هل لديك توقعات بهذا الشأن؟ يقال أن عام 2015 هو عام ميلاد جيل أبو ضرسين، ما رأيك؟ |
رد: توقعات علماء الفلك في عصفورية نورالأدبستان للعام 2015
اقتباس:
مافي داعي لإكسير الحياة، هني بيحكموا حتى وهني ميتين! الكرسي بيروح لمين، للحبايب طبعاً! وحبيب حبيب الشعب حيكون حبيب الشعب وإنت عارفة في قاعدة شهيرة لمندل بالوراثة .. قصدي لداروين..... الحاكم يورث جيناته وصفاته عبر الأجيال يعني الشهامة راح تضل بهالبلاد والذكاء السياسي والدهاء الاقتصادي كلو راح يتورث يعني جهاز الكفتة خليه للشعب الغلبان، الزعيم منو بحاجته اقتباس:
عند الجان تخلف كبير، ما عندهن حكمة هالمخاليق الي عم تحكمنا هناك كل واحد مكانته على قد قدراته، قال شو الجني المناسب في المكان المناسب! قلتلهن ما بينفع يا جماعة ما بينفع...... طب والجن الي عندو تخلف وين نوديه..؟؟؟ عنا قمة الديمقراطية، المعتوه بيكون مدير مخابرات والمريض النفساني بيكون قائد للجيش والغبي بيكون .............ما بعرف شو بيقولي احنا ما عنا إسرائيل، احنا شعب واحد وكلوا عايش متل ما بدو قلتلو في فرح بدون حزن قال لا قلتلو في نجاح بلا فشل قال لا قلتلو ونفس الشي ما في زعيم عربي بلا إسرائيل! ولا كيف بدنا نطخ حكي بالمؤتمرات......... بلا إسرائيل ما في طعم للشجب والاستنكار والإعراب عن بالغ القلق! أي نص مصطلحات السلك الدبلوماسي العربي بلا إسرائيل راح تتبخر..... كيف راح نقتل المعارضين ونرميهم بالسجون بلا إسرائيل؟؟! من وين راح نلفق لأهاليهم تهم الإرهاب والعمالة للخارج .......... شو أحكيلك خيتي لأحكيلك........ قال شو يا جماعة... ما عندهن حدود وما بعرف شو ..... قال شو ؟؟ الجن العربي بيطير من المحيط للخليج ما بيلاقي حدا يطلب منه جواز سفر فوضى خلاقة دخيلكم يا عالم عندهم الزعيم كلها سنتين وعالتقاعد! متشغلين في العالم، كل شوي غير زعيم ، جيبوا زعيم قلتلهن يا أغبيا عنا عشان يقعد الزعيم عالكرسي بدو 30 سنة وعشان يفكر يقوم عن الكرسي بدو 30 سنة ولما حدا من جماعته يتآمر عليه ويقلبوا بدو يقاتل فيو 30 سنة بكون الشعب مات، وأجا شعب جديد لساته بدو يفهم شو بيصير..كمان 30 سنة قالوا بدنا نستلهم تجاربكن، قلتلهم روحوا على قصر الحاكم وتعلموا هناك! قالوا دخيلك يا شمروخ وينو هالزعيم؟؟؟ كل ما نروح قصروا بنلاقيه مصيف بقصر بنروح عالقصر التاني بنلاقيه مشتي في القصر التالت دخيلكم كم قصر لزعيمكم؟؟! قلتلو بكفي نق يا غبي ! قال لشو كل هااااااااااااااد قلتلو يا روح أمك، هدا زعيم حقيقي مش هبل مثل المتخلف الي عندكم، لازم يرتاح ليريح الشعب عالآخر، حتى لو حدا فكر باغتيالوا بدو يطبق نظرية الاحتمالات! حادي بادي كرنب زبادي ........ - قال خيي خلو تجاربكم إلكن، لكم زعيمكم ولنا زعيم! اقتباس:
قصدك الجرذان والصراصير والنسانيس الي عم تتطاول على أسيادها ايه طبيعي نحنا عم ندك فيهن 24 ساعة لسنوات طويلة مع كبت لمدة تفوق النصف قرن يعني شو بتتوقعي منهن تتوقعي مثلاً راح يرمونا بالورد والريحان! أكيد لو مسكوا واحد فينا راح يآكلوه حي! لكن هيهااااااااااااات يمسكوناااااا ونحن وكل الأسود في الجبهة الخلفية عم نحمي ظهور البواسل في الجبهة الأمامية اقتباس:
أبو ضرسين أبو قرنين أبو نابين أبو راسين شو ما كانوا راح نقلع ضروسهن ونكسر قرونهن ونقطع رؤوسهن والي بضل براسوا قرون خليه ينطح لما يشبع ! توقعاتي هدا رد الزعيم عليهن وما راح يتغير هي سياسة الرد على التياسة الي انتهجها جلالته وراح يكون جيل ال 2015 جيل الواوا بامتياز والواوا راح يصير بح ب 2016 هدا رد القيادة حسب توقعاتي الفلكية ، وفيفي عبده كانت أم مثالية بال 2014 وهيفا راح تصير قدوتنا بال 2015 والي مش عاجبوا هي البحر قداموا يهاجر عالسويد. |
| الساعة الآن 08 : 10 PM |
Powered by vBulletin® Copyright ©2000 - 2025, Jelsoft Enterprises Ltd.
Tranz By Almuhajir *:*:* تطوير ضيف المهاجر
الآراء المنشورة لا تعبر بالضرورة عن رأي الإدارة وتمثل رأي كاتبها فقط
جميع حقوق النشر والتوزيع محفوظة لمؤسسة نور الأدب والأديبة هدى نورالدين الخطيب © ®
لا يجوز نشر أو نسخ أي من المواد الواردة في الموقع دون إذن من الأديبة هدى الخطيب
مؤسسة نور الأدب مؤسسة دولية غير ربحية مرخصة وفقاً لقوانين المؤسسات الدولية غير الربحية