على بيتك طليت
 

على بيتك طليت

حركت لقفل ,دورت المفتاح
وعلى بيتك طليت
من وسط الرحل,ركب طيفك لاح
تفكرتك وبكيت
ياك يالميمة ياك, مازال ترجعي ياك
ولا أنا غلطان؟
مازال غطاك في فراشك
مازال شربيلك وافي
مازال دواك عند راسك
مازال سريرك دافي
مازالا ريحتك,وعطرك وانفاسك
ودقات قلبك الصافي
يال يالميمة ياك,مازال ترجعي ياك
ولا أنا غلطان؟
مازالا صورتك معلقة فالحيطان
ونظاظرك والتسبيح والصلاية
والتيمومة وكتاب القرآن
ومريود لكحل والمراية
وزلافة الحنة وعواد الريحان
وبخور الكعبة,والعباية
والشال والجلابة والقفطان
آ لميمة ,خليك حدايا
خليك يالميمة خليك
نبوس راسك ونقبل إيديك
نقبل لقدام,جنتي نتوسلها بيك
نبوس التراب اللي وطاوه رجليك
خليك يالميمة خليك
خليك نشم ريحتك,وننسا حر ليعتك
نشرب من حوض الرضا,يلا نشوف في عينيك
ياك يالميمة ياك,مازال ترجعي ياك
ولا أنا غلطان؟
مازال بغيت نعود صغير
نلاغيك وتلاغيني
ترضعيني حليبك لغزير
وسط احضانك تخبيني
تحاجيني بحديث كثير
مابين دراعك تراريني
تفرشي لي قلبك الكبير
وباهداب المحبة تغطيني
ياك يالميمة ياك,مازال ترجعي ياك
ولا أنا غلطان؟
إيه أنا غلطان,إيه أنا غلطان
صافي يالميمة صافي
صافي عييتي وبياض جريدك
عاد بيتك مظلم طافي
مشيتي وسخيتي بوليدك
مشيتي مشية بلا رجوع
كسدة باردة حديدة
القلب بفراقك موجوع
والدمعة سايحة فريدة
خليتيني بنارك ملسوع
ونزلتي في قبرك وحيدة
صافي يالميمة صافي
مابقيتيش ترجعي صافي
من بعدك عضني الوقت بانيابو
حرمني من الحضن الدافي
قهرني بسوطو ولهابو
صافي يالميمة صافي
مابقيتيش ترجعي صافي
من بعد فراق الأم
عاداني الزمان القاسي
هزيت عكاز الهم
وضعت في أعز ناسي
حرمة دخيل لك ياملك الموت
مهل عليها مالك زربان
لحبيبة مي داقت حر الموت
لحبيبة مي خلاتني في احزان
لحبيبة مي مرشوشة بحنوط
لحبيبة مي ملفوفة في اكفان
لحبيبة مي خرجات في تابوت
لبات راضية دعوة الرحمان
آآآه يا لميمة آآآه
وحق اللي خلقك ونشاك
وحق اللي اختارك وخداك
وحق النور اللي جلاك
وحق التراب اللي غطاك
مانهنا غير إيلا جيت حداك


حسن الحاجبي

رد: على بيتك طليت
 

[align=justify]أصدق ما قرأت !! شكرا جزيلا لك أخي وجاري الحبيب الأستاذ حسن..أبكيتني مرات ومرات..لكنك أذهبتَ عني كثيرا من الهموم..محبتي وتقديري واحترامي..[/align]
[align=justify]تثبيت..في: 09 ـ 10 ـ 2017[/align]

رد: على بيتك طليت
 

العزيز الغالي محمد الصالح الجزائري
أمك وأمي سيان
أمك وأمي شجرتان مسقيتان بالعفوية والمحبة الصادقة لكل الناس
أمك وأمي من داك الجيل الدي منه رضعنا الحنان وحب الأوطان
وفاة أمك حركت في الأشجان,فأفصحت عما كتبت لأمي وأمك ولكل الأمهات
ألهمك الله جميل الصبر والسلوان أيها الغالي .

رد: على بيتك طليت
 

رد: على بيتك طليت
 

رد: على بيتك طليت
 

الزجالة المقتدرة فتيحة الدرابي
من لغير الأم تسكب العبرات وتنكأ اللوعات
جزيل الشكر الموصول على المتابعة والإهتمام ودمت أيتها الرائعة بكل المودة والتقدير

رد: على بيتك طليت
 

الأديبة الراقية ليلى مرجان
ألقيت هده القصيدة في التظاهرة الكبرى" قلب لميمة يجمعنا " وكانت سببا في سقوط عدد من المتتبعين مغشيا عليهم من فرط التأثر فقررت أن تكون فاتحة ديواني المنتظر نزولا عند رغبة العديد من الأدباء والنقاد .
لك سيدتي خالص الإجلال اللائق بمقامك الكريم .

رد: على بيتك طليت
 

زجلية جد مؤثرة أخي أستاذ حسن
ابكيتني و الله
سررت بعودتك و القراءة لك من جديد
لك تقديري و احترامي

رد: على بيتك طليت
 

قصيدة زجلية قالت كل شيء...أحسنت الأخ والصديق حسن الحاجبي في وصفك الراقي للأم...بعد غياب ليس بالقصير تمخضت قريحتك فولدت جبلا ...لك مني السلام

رد: على بيتك طليت
 

ياه! كم هي مؤثرة!
متألق جدا بكلماتك
في هذا اليوم المبارك - عرفة - أدعو لها بالرحمة، ولكل من فقدناهم من أحباب..
والله يرحمنا على هذه الأرض