منتديات نور الأدب - رح ضل جدد فيك إيماني

رح ضل جدّد فيك إيماني
د. نجيب بجاني
رئيس تحرير مجلة المواهب العالمية

يا رب من قلبيووجداني
رح ضل جدّد فيك ايماني
نياَل ياللي محبتك بينال
ويبقى لعَظَمتَك راكع وحاني
في غربتي عايش بأحسن حال
ولبنان لما سمعت ناداني
قلبي احترق ورجعتلو بالحال
للوفق اكتب كل قصداني

يا حسرتي عا موءل الأبطال
فيه انفجر بركان جواني
بدلوا عبادة ربنا بالمال
صارت جهنم حقد ملياني
وعالمناصب دَوّروا القتال
والناس بالمليون جوعاني
والأوفيا بالحرب صاروا قلال
ولا شخص عم يفهم على التاني

يا خجلتك لبنان بالإذلال
عالبعض... والشاشات خذلاني
والذل صورة ما بترضي الحال
التقدير شيمة في إلو معاني
لا تفجّروا براكينكم أشكال
وبالنهاية كل شخص فاني
عالوفق عِنا بالغرب إقبال
والشعب عالأوطان متفاني

وعن جدارة بيطلب استقلال
استقلال صانو رب فوقاني
شيل يا ربي البلا والفال
ياللي عليهم نازل عياني
وأطماع ما كانت تجي عالبال
والتفرقة البذّم خلقاني
وشر السياسة البيهد جبال
وأعطي المناصب ناس شبعاني

والطائفية البينهم تنشال
وما يضلّ في مظلوم أو جاني
الذم عالشاشات أوحى وقال
صرح اللياقة دمّرو الباني
حطوا الكرامة بسلة الأهمال
مش عيب يسمع هيك بجاني
لبنان مجدو كان ما بينطال
صرت أخجل قول لبناني

بمواقفي اعتزيت للأجيال
عملت الفضا والأرض ميداني
وبعد الريادة ما كبي الخيّال
بعدو الوطن لبنان عنواني
ما عاد بدنا حروب يا متعال
توحيد بدنا... بعطف رباني
يعيشوا سوى بلبنان بالإجمال
بالتوعية... ما يفرّقوا دياني
ويبقى التفاهم سيّد الأحوال
وترجع ثقتنا ببعضنا ونقول

بلبنان بعدو الشعب أنساني