البارح شفت فالمنام
 

البارح شفت فالمنام
قولو خير و سلام
سافرت في رحلة بعيدة
و ركبت سفينة لحلام
.......
شفت السربة و لعلام
و الخيل بالسرج و اللجام
و بلادي زاهية سعيدة
فيها لمواسم ولخيام
.......
النشاد يرتب النظام
يحكي و يطرز لكلام
يقول قصيدة جديدة
و يبوح بسراير لغرام
......
اولاد بلادي بالتمام
كلشي ناشط و خدام
عادت العيشة رغيدة
و عادت الملحة فالطعام
......
البنات تصافو روام
يدرجو كيف لريام
الخدود مفتحة وريدة
و الشعر كريش النعام
......
فتحت عيني فالظلام
نجبر نفسي فلوهام
الكسدة باردة حديدة
و الرعدة شدات فلعظام
......
راحو غابو دوك لقوام
و تخطر الذيب فلغنام
صاحت موكة فلحصيدة
و الغراب في سرب لحمام
......
وقتاش يا رب الانام
تتحقق ديك لحلام
تقصار الطريق البعيدة
و تصفى السما من لغمام
......
نعيشو في هنا و في سلام
و نصبحو خاوا على الدوام
نوقفو وقفة شديدة
و نغلبو ولاد لحرام
......

حسن الحاجبي

رد: البارح شفت فالمنام
 

مرورك ابداع..

قناديل تضيء كلماتي المعتمة..

تزيدها رفعة.

تحياتي