منتديات نور الأدب

الخطبة

صورة تراثية من الفرح الفلسطيني

استوحاها وعاشها وكتبها

الداعي بالخير : صالح صلاح شبانة

*****************

الخطبه بوابة العرس ، ولولا الخطبة لا اتجوزنا ولا اتهنينا ،

ولا أضوينا إلكوس الفرح ، ولا عزف بديارنا مزمار .

ولا التقن راسين على وساده تحت سقف بالحلال ،

ولا اتهنوا اثنين ببعض ، ولا فرحت عيشه بعبد الجبار .

والخطبه مثل أساس الدار ، بسبقها مواسم ومراسم ،

وجولات من ألمكوكيه وأساليب ، وقف العقل قدامها محتار .

وفي المجتمع أيام زمان اللي بقى مغلق ،ويا ويل ويله !!!

اللي بضرب بنت بطرف عين ، بالذمه غير يوكل قتل قد حمار .

وما بقى للبنت متنفس تلبس اللي ع الحبل و تباهي بحلاها ،

وشغل إيديها من ثياب ، وتعطي حالها ما يلزم من اعتبار .

إلاّ ع طريق العين ، تلبس لبستها ، وتحمل جرتها ولآّ كازتها ،

وتمشي تشمخ بقامتها ، ولا الضابط بوسام الإنتصار .

وبقوا يعرفوا فلانه بنت فلان ،حلوه يا حلاوتها ،

يا مين يسبق ع خطبتها ؟؟ ومين بدها تسعده الأقدار ؟؟

في الخطبه رغم إنها معروفه فلانه بنت فلان ، وأمها معروفه ،

كان أصيله ولاّ مهجنه ،بس لازم يبقى هناك أسرار .

ها لظبيه اللي من بَرَّه الله وميت إسم الله وما شاء الله ،

يا ترى مجوه مثل بره ، ولاّ مش تحت كل قُبَّه في مزار ؟؟

لازم أمه وخالاته وخواته وعمّاته وعظام الرقبه

من قراباته ، يسحبن حالهن ويعملن زياره للدار.

هل هي يا ترى فالته ولاّ محجوزه ومحَيّره ، وحاكي فيها حدا ؟

لازم إيعسِّن الأَمر ، ويعرفن كل الأخبار .

ويحملن النتيجه الأولى لأهل العريس ألأقربين ، لأنها الِسّريه مهمه

قبل ما يحين الوقت ، وتنزل ألطبخه عن النار .

وإذا الأخبار بتسر ،بدهن النسوان يروحن يحكن مع امها ،

ولاّ عن اللي بنوب عن امها ، إذا المسأله دخلت دائرة القرار.

وما بحملن جواب ،لأنه الجواب بده زياره ثالثه ، يحملن النتيجه ،

بعد ما تبقى الحرمه شاورت جوزها المغوار !!!

وفي الزياره الثالثه ، بعد ما الطريق تعبدت ، وبلاش نقول تزفتت ،

لأنها الملافظ سعد ، وما نخلط الجد بالهزار .

تبقى أم العريس ولاَّ وحده قارحه ، صاحبة خبره ،

وباعها مثل لسانها طويل ، وإلها تجربه في ها لكار .

تفحص العروس ع المزبوط ، شعرها طبيعي ولاَّ عيره ؟؟

وشو نوعيته و مدى جودته ، لما تفلته ع الظهر طيّار ؟؟

واسنانها شو حقيقتهن ،ماكنات ولاّ مخلخلات ؟وما يبصقن خيخه ،

قبل البطن الثاني ولاَّ الثالث ، يبقى كل سن في ديار !!!

وثمها ؟ بطلعله ريحه ، ولاَّ مثل ثم الغزاله ، ما بطلع منه إلا المليح ،

كان من الحكي ولاَّ الريح ، أصلي مثل اللولو والمحار.

وكيف عوسها ؟ هي نظيفه ولاَّ وخمه ؟وكيف صحتها وأعصابها ؟؟

فيها مرض ومرخرخه ، ولاَّ عصبها بقدح شرار ؟؟؟؟

من ما بتدخل ، بتبوس العروس وبتشد شعرها وبتناولها ،

لوزه ولاَّ جوزه تِكسرها بسنانها ، وبتلظّمها خيط الكرار .

وبعد ما تخلص التجارب ، وصارت العروس مضمونه ،

مثل الذهب البرلنتي ، وأهله وأهلها موافقين ونِعّم الأختيار .

بقوموااكم واحد من أهله بزياره لدار أهلها وبشربوا القهوه ،

وبحكوا في الموضوع اللي بقى بين النسوان سَيَّار .

وانطبخ مثل شاي سميره ع الحطب ، واستوى مليح وما ظل غير

المراسم اللي هيه ، واعلان الخطبه بالطبل والمزمار .

وبتيجي ألجاهه الكريمه ، وبتّسَيّر ع دار العروس ،

وضروري يحضروا وجوه البلد وأعيانها والمختار .

ويطلبوا البنت رسمي من أهلها وقرايبها ، وبعد أكم من يوم ،

ولاَّ أسبوع يعلنوا الخطبه ، وللخطبه قدر ومقدار .

فيها ذبح وطبخ ، وحامض حلو وقهوه وشاي ودخان ،

لكل من أجا وحضر من أهل ومعازيم وزوّار .

وجايز يدخل العريس إيلبس العروس ،وينصمد حدها !!!

ويغنينلو امه وخواته وقرباته ع الداير من دار .

وجايز ما يشوفها غير ليلة الدخله ، ويعيش ع الوصف

ها لحلم الكبير ، وهو وحظه في ها لوقعه اللي مثلها ما صار .

تُقرأ بلهجة أهل سنجل .