بحَبِّة هدوء
وقبل اما نِحْبـِس شبابنا البريئ ..................
................ تعالـــوا نشوف اللي كان السبب
تعالــــوا نفكـَّر بحبــة هـــدوء ...................
................ نشوف ليه وَصَلنا ليوم الغـَضـَب
نلاقي المواطِن حياتـُه في ضِيق ................
................. وبيتـُه الصُغـَيَّر عليـــه انخـَرَب
لقى نفـْسـُه ضايِّع ف وسْط الطريق .............
................ لا مات واستريَّح ولا هوَّ عـــاش
وأسعار بتغـْلـَىَ يوماتي عليـه ....................
..................... وهُوَّا بيقبض بنفس الأجُــور
وبعد اما كان بيقولولوا يا بـِيه ....................
............... بقىَ طـُور في ساقيَّه وعَمَّال يدُوُر
عشان يلـْقـَىَ عائد يعَكـِّز عليه ....................
................... مع فلوس مُرَتب مَيـِكفيش فقير
وجار مليونير ماشي قـُدَّام عنيه .................
................. من العِِز منفوخ وعامِل طـَنـَاش
وزاد الحكايه عليه البوليس ......................
..................... بيعتِقلـُه دايمًا بدون اتِهــــام
يحُطوه يحارب في حبِّة ناموس ................
............... في تخـْشِيبه غرقانه مَيَّه وضلام
ناموس كل واحده بحجم الجاموس .............
................... مِلازمُه مخليه ما يعرف ينام
وإن عينـُه غِفـْلِت يصحيه كابوس ..............
............... بحلـْمُه الرهيب اللي مَبْيتـْنساش
تعالوا ادخلوا في بيوت الغلابه ................
................... تِلاقوها عايشه مع المُستحيل
وكل البيوت عامله زي الخـَرَابه ..............
............. ما يدخـُلها نور في نهار أو ف ليل
وإبنـُه ف مدارس وآخِر خـَيابه .................
................. حُمَار بس ناقِص يرَكـِّبلـُه ديل
وأما المُدرس فزي الديابَـه .....................
............. يا درسين خصوصي يا إمَّا بلاش
ولو كان حكومة البلد دِيَّا ناصحه ..............
...................... لكانت تحاول تحل المشاكل
ويمكن مشاكل كبيره وطارحه .................
................. ولاكِنها عاوزه مُخـْلِص وعاقِل
يفـَتـَّح شويه يلاقيها واضحه ...................
................. ومحتاجه يحْسِب شوية مسائل
مع الصِدْق ومْعامله فيها مُصارحه ...........
................... وتأمين معيشـَه لحد المَعاش
ودستور قديم من زمان فيه أمُور ............
................... عتيقه ودارت عليها السنين
وفيه المعاني ما بين السطـُور ................
..................... وتنفع نفَسَرها بالمعنـَيين
ومحتاج لواحد مُخضرَم خبير ..............
................ يِظـَبَّط موادُه اللي مِتـْفـَبْركين
عشان بيه مراكب بلدنا تسير ................
................... تمُر ف زوابع ومتهزهاش
قانون الطوارئ ملوش لازمه خالِص ........
............. كفايه المُوَّاطِن حياتـُه ف طوارئ
ويومه ملان بالألم والحوادث ...................
............ ما فيه ساعه واحده يكون فيها رايق
في وسْط المشاكل ملخـْبَط ولايِّص .............
........... وقطر الغـَلا برضُو ف العِنـْد سايِّق
ولو مجلس الشعب لامِس وحاسِس .............
.................. بأزمة مواطِن لـَصَابُه اندهاش
وليه الضرايِّب على كل حاجه ...................
................... ما سابت ولا حتى شقه بْإيجار
وليه المواطن هيدفع في حاجه ...................
................. ومعروف إنها تبقى للأسره دار
وليه الوزير يبقى زي الخواجه ...................
............ اللي فلـِّس وباع حتى عُقب السيجار
فجاب الدفاتِر يشوف أي حاجه ..................
................. ديون ع الزبون من زمان ملتقاش
وليه ييجي نايب مينفعش نايب .....................
..................... بتزوير نتيجه في يوم انتخاب
وهربان من الجيش وحق الضرايب ..............
.................. ويمكن كمان كان حرامي وتاب
وفي دايرتـُه يبقى إس المصايب ...................
................. وف حواره دايمًا يكون فيه سُباب
ورغم انه خايب وشايب وعايب ..................
............... معلـَّق يُفـَط قال ( نزيه ) مخـْتشاش
وحتى العلام في البلد كلـُه فاشل ...................
.................... يخرَّج صحيح في النهايه الكتير
ورغم انـُه خريج وأبيض وجاهل ...................
...................... مِعَشـِّم يواصل ويوصل مدير
وعامل بسيط هوَّا بس اللي شايل ................
..................... مصالح بلاده بجهدُه الوفير
بإخلاصُه مش بالكـُوَّس والجمايِّل ..............
................. ودايمًا في كل المِحَن مَخـْتـَفاش
بلاش يا حُكومه من المحسوبيه ...............
................. وشوفوا المصالِح ملاها الفساد
بلدنا بنيلها وناسها غنيَّه ..........................
..................... وياما بتِحْسِدها ع الخير بلاد
فخلـُّوا الدخول ع الجميع مِتساويه ..............
.................... لا فيه حد ناقص ولا حد زاد
بلاش يا حُكـوُمه تبيعي الرَعِيَّه .................
............ برُخـْص التـُراب واللا حتى ببلاش
_____