ونشرنا ع الفيس مواعيدها
وكتبنا للشرطة ف عيدها
إن أنتوا إخواتنا وأهالينا
ومعاكوا نحرر أرضينا
من ظالم بتحكم فينا
* * ** * *
ونادينا وبكل القوة
طالبين نخرج بره الهوه
اللي رمونا سنين جواها
ونظامهم حاكم ف غطاها
فـ سابونا ننادي و بحرية
إن وطنا أصبح غابة
وإننا ضايعين وسط ديابا
والناس فاهمين وبتتغابا
ونادينا الشعب بوطنية
فلاقينا خراطيم المية
مفتوحة وبتعمي عنينا
ورصاصهم بيقّتل فينا
ومايفرق أحمد عن مينا
وإخوات تستشهد قدامنا
طالبين التغيير في نظامنا
حتي حكومته اللي بتحمينا
خدت الأمر عشان تأذينا
إذاعتنا اللي بقالها سنين
بتسمع للناس عناوين
قولنا اليوم راح تدخل بيتنا
وهتسرد ع الكون حكايتنا
وتنور عقل الملايين
لقييناها رمتنا بتزييفها
واخدة الأمر من السلاطين
آه يا إذاعة وعايشة الدور
وبترسم كده ع الجمهور
اخبار كدب وأنباء زور
و مراسل زوق بـ ديكور
ومسح أفعالنا بأستيكا
كتبوا الأخبار بالبوليتيكا
ومازالوا كاتبين في سطور
إن الشعب ده كان مقهور
وبثورته هيطفي النور
اللي أضاءه حسني ف زور
كفايانا بقي م التأليف
عيشوا الثورة بقلب نضيف
خلوا إيدينا تمحي الزيف
والثورادي ما تصبح طيف