[منى كبارة]

مساء الأنوار..
وفي نفس الميعاد ..كان لينا لقاء
لنتابع معاً الجزء الثالث
ومع وش الخير ..عم عثمان النوبي
نبدأ حكايتنا الجديدة ..







خط سير ..وفاعل خير

...................



عم عثمان..راجل نوبي مولود في بورسعيد..وساكن في شارع أسوان ..وفي الأربعينات ..كان له خط سير يومي ..يخرج من بيته الصبح ويقول..ارزقني برزق يومي..ومشوار الصبح في الصيف ..وفي الشتا واحد..يروح جنب المينا..وعلى صدره صندوقه الخشب ..المتعلق في رقبته..وعليه أنتيكات وعقود..ويدعي إن المركب الإنجليزى تعود..ويستنى بحارتها على باب عشره ..أغلبهم يعرفوه ..ودى عِشرة ..








ويطلع بعد كده على البيت الحديد.. إللي كان في شارع الجمهورية ..والكازينو إللي فيه يسهر للصبحية ..حركة بحارة وتجارة ..ويبيع وربنا يرزقه ..وبعد كده يخش على محل جيانولا إللي قباله..وهنية له لما يقابل الخواجة يني اليوناني..يرزق منه ..وبعد كده أرمنيوس الأرمانلي ..أصل بورسعيد كانت مليانة بالأجانب ..زى بر مصر في الوقت ده من الزمان..والكل يديله الأمان.


وبالليل يطلع على فندق وكازينو بالاس ..معاه الفل والياسمين ..والموسيقى والرقص اليوناني..ويبقى فيه خليط جميل من الروايح ..وانت واقف على رصيف سيبس..تلاقيه فايح.


وفي الصيف ..يطلع الصبح على البحر ومعاه الفل والياسمين ..يلف على كابا نون الغزل ..إللي كان زمان على البحر ..وبعد كده يطلع على كازينو الجزيرة في رحلته اليومية ..والرزق يحب الخفية ..وأجمل ذكريات.


وخط سيره ده استمر من الأربعينات لحد نهاية الخمسينات ..لما وصل من العمر للستينات..وكان سمار بشرته وظرفه ..حبب الناس فيه وفي هيئته..لحد رجله ماخانته ..وإتزحلق من على الرصيف ودماغه خبطت فيه..وأغمي عليه..ولما فاق لقى نفسه مابيشوفش ..حصل انفصال شبكي وإتهدد بالعمى .. والراجل رزقه يوم بيوم..ولو بطل يوم..العيال في البيت بالكوم.



وإبتدى خط السير من جديد ..ويرافقه فيه ابنه وجيد..وكل مايمر على الناس إللى تعرفه ..تشترى كل إللي معاه..صعبان عليهم ياولداه..بس لما حد يديله عطية لله..كان يبتسم وسنانه البيضا تبان..ويديهم مكانها اللبان..أصل نفسه عزيزة عليه.


وفي رحلة الصيف ..عند البحر..لما كان بيمر بين الكباين الخشب الأبّهة إللي اتحرقت أغلبها في ستة وخمسين..شافه الراجل الطيب..إللي كان من الناس المعروفين يعطي لله..واسمه مايبقاش من المذكورين ..حسنته خفيّه..وعيشته هنيّه..ولما إفتكره نادى عليه ..وخد منه كل الياسمين..وقاله انت من معالم بلدنا..ومن الناس الطيبين..وعليّا لك دين..انت فاكر لما خدت منك الياسمين من سنين ..كان عقد جميل ووشه علينا زين..لما خدت توكيل مركب ومدتها بالتموين..وفتحها عليا ربنا من وسع.. وإتفائلت بيك وبالياسمين..إنت فين ياراجل من سنين ..وطبعاً عم عثمان مش فاكر..ياما باع لناس كتير ..بس لما سمع إسم الراجل الطيب ..عرف أصله الطيب ..ده من أهل البلد المخضرمين..وحلف الراجل ميت يمين..وبإذن الله يرجعله نور العين..وإتعهد بعمل عملية له ..عند أحسن الأطباء في مصر ..بس طلب منه إنه مايذكرش إسمه..ويفضل إنه يكون فاعل خير..وربنا يكتر من أهل الخير فيكي يابورسعيد..


وإنكتب لنظره عهد جديد..يشوف بيه كل الأماكن الجميلة ..إللي كان بيشوفها في خط سيره..
وضاف لسيره رصيف سيبس..وندر يدي للأحبة والخُطّاب ..الفل والياسمين من غير مقابل ..
لأن إللي قابل فله وياسمينه بالخير ..حببه في فعل الخير..




مع خالص تحياتي..