[فتيحة الدرابي]

اللي احرت الأرض
احصد غلتها وجناها
واللي اتكتبت اعليه خطوات مشاها
واللي اجمعها حتى اجمعها
امشى وخلاها
هادة هو حال الدنيا
ما دايم فيها غير مولاها
فكر ف حال الدنيا
أو رجع لوديعة لمولاها
فكر ف فناها
الدنيا عزيزة
وعز منها اللي اخلقها وارعاها
بسط الأرض وارفع اسماها
واعرف كيف يضبط ليلها مع انهارها
فوق الأرض خيرات كثيرة
تسلبنا ببهاها
وف جوفها كنوز دهبها ومرجانها
إلى بغات تجي
تشربك اعسلها وعذوبة ماها
وإلى بغات تمشيي اتقطع احبالها
ما تعطيك حتى ثانية
التوب فيها من ابلاها
اخلق جادبية امرسياك ف الأرض
وشادة اقدامك بثرابها
طعمك ف بطن أمك ف جوف ارحامها
ارعاك حتى اخرجت وشفت اضواها
ازرع احليب يشبه النقرة في اصفاها
سخر لك اغنمها وابقرها واجمالها
خير الله عليك كثير يالغافل
يا العايش وناسي للصلاة اوقاتها
رد بالك كل من عاش فيها
امشى انساتو انساها
حقو شبر فوق الأرض
مهما اكبر شانو ما يتعداها
احسب احسابك ووفيه
قبل ما الموات تاخدك بلا شوارها .