|
رثاء
أمين يا ولد خويا
من دم امي وبويا
اعزيز ومقدر وغالي
وردة امفتحة زينها يلالي
اعطاه الله زين الصورة ولفعال
بحالو في هاذ الدنيا قلال
لو بإيدي نفديه بالروح
ونسخى حتى بالمال
أخلاق وذاب متعو بيها الرحمان
بشهادة الأهل ولصحاب والجيران
صورتو الزوينة ديما ف البال
مرسومة محفورة
باش يزول ويتنسى محال
اعطاه الله واخداه عندو ف العال
الله يصبرنا على هاذ لفراق
جا بغثة وكان فاجعة كبيرة
خلاتنا ف حسرة وحيرة
ما اقدرنا انصدقوا
ما نفعتنا غير التكبيرة
أمين انت طرف من كبدتي
تقطعت بالسكين
ف دواخلي نسمعها
تبكي وتنين
التكوات بنار لفراق من الجهتين
لو بإيدي نحميك وسط العينين
لو بإيدي نوقف قدام عزرائيل
لو بإيدي نغير القدر بالنهار قبل الليل
الله ابغاه والداه
اعطاه واخداه
هو أمانة عند مولاه
يا رب ترحمو وترعاه.
نور الأدب (تعليقات الفيسبوك)
|