[علاء زايد فارس]

مقاومة الأدرينالين !
بقلم علاء زايد فارس






مجنون بسأل محشش:


أنا نفسي أفهم هالشغلة!


- قول يا زلمة ...


- ماش الأمم المتحدة لعبة بيد أمريكا والغرب وإسرائيل؟؟!


- مزبوط


- والفيتو دايماً قارف أهالينا هناك؟؟


- مزبوط مزبوط


- ودايماً بنروح من هناك مكسوري الخاطر زي مالك الحزين ؟؟!


- مزبوط مزبوط مزبوط



- طب ليه كل شوي واحنا ناقلين ملفاتنا لهالأمم المتحدة؟؟؟


- شو فهمك انت بشغل القيادة الحكيمة؟؟
القيادة عم تكتك لتحرج أمريكا في مجلس الأمن!


- شو يعني لما نحرج أمريكا ؟؟
شو بيصير يعني؟؟!


- الحين ماش احنا بنكشف حقيقة أمريكا قدام العالم لما تستخدم الفيتو ضدنا؟


- طيب ما العالم كله بيعرف حقيقتهم، وشو يعني لما نحرجهم!


- لما نحرجهم في هرمون اسمه أدرينالين بيتدفق في الدم بتفرزه غدة اسمها اسمها ..؟؟
اسمها على وزن اسم ستي رسمية!


- قصدك الكظرية؟؟!


- هي الغدة لما تشتغل بيعرقوا وبتزداد ضربات القلب وممكن تصيب المندوب الأمريكي أو الاسرائيلي سكتة قلبية من كتر الإحراج والخجل!

- وبهيك بنكون تخلصنا من واحد من أعداءنا !
آه فهمتك الحين، هي نوع من المقاومة يعني ؟؟!

- هي مقاومة الأدرينالين مش مقاومة الصواريخ الفشنك، احنا بنعذبهم بدون ما نخسر شهدا وجرحى، وراح نضلنا نحرج بواشنطن لما ترجع فلسطين لصحابها !

- الحين فهمت المزبوط، بالك كيف حيصدق الشعب الجاهل هالحكي؟؟
لازم نشوف حل ليبطل يزاود عالشرفاء في القيادة الحكيمة والجامعة العربية !


- الحل موجود يا قلبي، الحل موجود!

لازم القيادة توزع الحشيش مجاناً برعاية الجامعة العربية على كل الشعب العربي من المحيط للخليج!




علاء زايد فارس

17/3/2014