ما اسخيت بيك با لحنين
صورتك مرسومة من سنين
ما تمحيها الموت ولو بعد حين
حبي ليك حب دفين
فين نلقى بحالو فين
حبك فيه عطاء شجرة
الزيون والتين
حب اخضر بحال شجرة الفلين
حبك محفور على الجبين
كان امعاي اسخي
وفر لي بدل اللقمة لقمتين
خصص لي من وقتو بدل الساعة ساعتين
اعطاني الحنان وكان لي الظهر لمتين
احماني وانا اصغيرة
وآنا اكبيرة كان لي الأب لحنين
يا ربي المعين
خبر موتك كان قنبلة سدت لي الودنين
حرت انصيح ولا نجلس ولا نوقف
ولا نمسح الدمعة النازلة من العينين
طول الطريق شاردة النفكر غير فيك
امتى نوصل انقبل الراس
وانعاود انقول لك اشحال كنبغيك
افراقك ماشي ساهل اعليا
كنت امعمرة بيك قلبي
وكنتي ظو عينيا
خليتي فراغ كبير
ما يعمرو حد كبير شانو ولا اصغير
الله يا با لحنين
توحشتك انت هو الحبيب
انت هو صاحبي لبعيد ولقريب
انت هو الاطمئنان
انت هو اللي كنت انحط
راسي اعليه وانحس بالأمان
كيف نشوفك وانت تحت الثراب
كيف انبرد هاد النار
وانخفف من هاد لعداب
عارفة كلنا نتسناوا ديك الساعة
ولكن شيء حاسة بيه فوق الطاقة
شيء يدمي قلبي
ويخليه يبكي من الداخل
شيء ما شي ساهل
شي ما يقدر اعليه العاقل
شيء واحد امسطر ف اكتاب
هو الايمان بالله والساعة والحساب
هو اللي امصبرني على هاد المكتاب
الله يرحمك ابا لحنين
والله يرحم كل اموات المسلمين
آمين.