[عزة عامر]

قعد المحبوس يكتب عن سجنو
لقى وحشة على سطور أيامو
ورواية شوق فأخدها ف حضنو
قال في مرايا لنفسو كانت جنبو ،
ولا كان يعرف أبدا إيه ذنبو
يااااا دا العمر أخدني
رغم انو اتقدم وبيطلع نقصني ما زدني
وسنين مرت فيه بالعافية وسعات بالذوق
طبخت عافية في حله مرارها وحلفت ليدوق
كان صايم يومها فطر دمعه
مدت إيدها تطفي الشمعه
وتسلم ضلمتها في كفو قال ما بسلمش
وشال إيدو كأنو على وضوء .
كان لسه بيمضغ في طفولتو
وبراءة حد ما يعرف سوء
لكنو اتعلم يتلاءم على دنيا خبيثة وبراءتها
مهي دي اللي باعوها في أنخس سوق
عملت خجلانه انو كسفها رفعت عينها
وبصت من فوق على راسو ونزلت بقدمها
مسكت ف هدومو اللي لبسها وحلفت ليفوق ،
على غرقو في موجها ودوامة
تاخدو لبعيد وتعطشو شوق
وف إيدها الميه بتدلقها.
لو حلمو يقرب من روحو
من شط نجاة وف إيدو الطوق ..
قرر يكتب وحشة بوحشة
ويطبطب على سطر بسطرو
ويهدهد حرفو وكلماتو
وينيم بالكذب سكاتو
ويقول للناس شايفين مني طول الضحكة ؟؟!
كفقير ليكم سدد دينو
والفرحة الطالة بإحساسو
ومخبي الحزن اللي ف عينو
شايفين ازاي أنا بتبسم
ما بخافش ان الدنيا تضلم
وأنا بتعلم ..
ويقولو عليه يا سلام سلم
خلاهم بيقولو يا بختو
وبكام كذبة ضحكو على حياتو
راحو وماتو وبإيدو هو اللي دفنهم
عيط واعترف انو ما خانهم
لكنو كان عايز يكذب ويصدق نفسو
إن الإيام السود مهما يمروا لكن ما بيقسو ،
وان الأحلام بتصون دايما تفسير أصحابها وما بينسو ..
وف يوم أحلامو هتتحقق ، طنش او كان ليها مدقق
كان حلمو كبير وبيتفاءل
رغم ان الحظ شافوه عنو أعمى ومايل ..
لو كان شافهم عند ولادتو .. عملو عمايل!!
كأن حياتهم واقفة عليه ،
ولا هيشوفو بغيرها عنيه
حتة واد هيسوي هوايل ،
صرخ الولد
قالوا دا الشيطان جاي من جهنم ينغزو ،
جريو وشالوه من ع السرير واتنرفزو
سمو عليه وادوه لابو
وقالولو واد يحرس جمال اللي جابوه ،
حبوه وف ايدو كرمشو كام مية جنية
ومشيو وسابوه ،،
قعد أبوه يبصلو .ويقولو يا ابني يا منيتي
خليك سندلي في دنيتي ..
صرخ الولد ..ياعم جايب حيطة مايله
وتقولي خليك لي سند
وعليها عايز تتكل بجتتك وتتسند
ونسيت يا ابويا ان الولد كان نفسو قبل ما يتولد
إنك تروح بنك الحظوظ تحجزلو حظ في كام سند ..