[ميساء البشيتي]

عاجل

عاجل

عاجل

أنا مريضة كتير وانتو ما عم بتوقفوا مواضيع شيقة وشو أعمل ؟؟؟

انا من زمان ما مرضت هيك مرضة وبصراحة انا مع الدواء عم أزيد بالمرض

ما عم أسمع باذني لأنه فيها طنين مزعج وشكله المرض بده يتفاقم

على كل حال أرد على مين والا على مين ؟

على سيرة المدونات انا كانت مدونتي ضايعة الها كم يوم وانا حزينة وساكتة

ولكن المرة اتخذت قرار بتطليق مكتوب بل بالخلع

وفعلا عملت مدونة جديدة في مكان انا نفسي فيه من زمان ولكن الضرة مرة

سكرت مدونتي الجديدة وفتحت على مكتوب لقيت مدونتي ظهرت ما تتخيلوا

سعادتي قديه كانت صرت انط من الفرحة ليش ؟؟؟

لأنه النشر بينشر الواحد وين ما كان بس الألفة والناس الطيبة ما بيلاقيها وين ما كان

مثل هذا المنتدى هو صار بمثابة بيت النا وهذه المساحة فيها بنخلع كل الرسميات والألقاب

وبنتكلم من القلب للقلب حتى بدون ما نخضع حكينا لأي رقابة ذاتية مثل ما تكون انت بتحكي

مع أخوك أو أختك في بيت العائلة .... طبعا كلنا أو غالبيتنا مغتربين يعني صعب جدا

انه نلاقي هذه الأحاديث الحلوة في المغترب واحنا لوحدنا وما حدا فاهم علينا شو بنحكي

لذلك المنتدى كان البديل وكان هو الحضن الدافىء اللي لم شملنا وجمعنا على الكلمة

الصادقة النابعة من القلب ولقلوب الآخرين مباشرة .

نصيرة الشقية ما زالت تبحث عن الشقاوة وبدها ترجعنا لأيام الخطبة

يا نصيرة شو بدك تعرفي عن أيام الخطبة ... أنا خطبت قبل ربع قرن يعني

كتير عتيق بس مع كل هذا تزوجت بطريقة عصرية أخذت الشخص اللي حبيته وهربت

من فحوصات الخطبة اللي بتعملها الحماة وبنت الحماة من البندق وتكسير البندق لفحص

أسنان العروس ومن تقديم القهوة وغلي القهوة ومن كم صنف بتعرف تطبخ ... يعني باختصار

هو كان شايفني وعارفني وانا كذلك والأهل كانوا بالنسبة النا أمرهم محسوم تماما ولكن يا نصيرة

صدقا انا ما كنت أعرف أطبخ لأني تزوجت صغيرة يعني من الجامعة على الزواج على طول فكنت أعجّب

وزوجي رجل يحب الطعام وهو صارحني بهذا الشيء قبل ما يصارحني بمشاعره لذلك كان يتعرض

لصدمة تلو الصدمة لكن مسكين كان يقول طبيخك زاكي يعني بيواسي نفسه وفي يوم قلت اله

نفسي بأكلة مجدرة وهي عبارة عن الرز مع العدس اللي لونه بني وهي طيبة جدا فذهبنا للسوبرماركت

وقلنا له بدنا رز وبدنا عدس وتطلعت لزوجي بدون ما انتبه لصاحب السوبرماركت انه أذنه معنا وقلت

لزوجي بجدية يا ترى العدس بده نقع قبل الطبخ والا لأ؟؟

زوجي تطلع فيّ بحيرة شديدة وهز راسه مش عارف وإذا بصوت صاحب السوبرماركت

يجلجل من الضحك ويقول يا طول ما تاكلوا مجدرة ....

ودمتم احبتي