[مرمر يوسف]

يا ألف بعد الشر عليك ** ألفين سلامة ياشرقاوى

شهرين تمام مربوطة عنيك ** وغلبت تصرف وتداوى

ام اسماعيل قالت " لبخ" ** لبخت وسمعت كلامها

مين اللى قال لك تطاوعها ** أم إسماعيل مين علمها

عمالة توصف لك وصفات ** وسمعت منها ميت شورة

وكل يوم مرضك بيزيد ** أم إسماعيل مش دكتورة

طاوعتها فى خمسين وصفة** خلو العيا بيزيد شدة

لو كنت رحت المستشفى** كان العيا راح من مدة

حاطط على عنيك الرفروف ** رباط قذر راح يعميها

من الرباط دا إزاى حتشوف ** شيل القذارة دى وارميها

فوق الطاقية لاطع لى حجاب ** ضد الحسد عيب ياابو شيبة

اللى كتب هولك نصاب ** ايه ينحسد فيك بلا خيبة

سيبك ياراجل من التخاريف ** دا العلم فى الدنيا اتقدم

والطب غطى كل الريف ** افهم دى احسن تتندم

فى الوحدة تلقى علاج ببلاش ** وكل من فيها حبيبك

لا تلقى دجال ولا بكاش ** يخبط فلوسك ويسيبك