[ميساء البشيتي]

وفنجانك بيقول ..........

خير اللهم اجعله خير .. ومع إني ما بعرف أقرأ الفنجان .. ولا بعمري
قرأت لحدا فنجان .. لكن فنجان قهوتك اليوم مقروء للكل .. للقاصي والداني
وحتى للأمي بالكتابة والقراءة ورشف القهوة ..
غرقان يا ابني انت في بحر من الهم والحزن .. هربان .. لوين ما بعرف ..
لكنك هربان .. هربان حتى من نفسك .. ما عم تتطلع في مرايتك .. خايف تشوف
وجهك فيها .. خايف تفزع .. لايمتى حاتفضل هيك هربان .. مغطي وجهك بغربال
كل ملامحك مفضوحة وأحاسيسك مكشوفة .. زعلك .. حردك .. غضبك .. استياءك ..
قهرك .. حزنك .. ألمك .. وحدتك .. كله مكتوب هون .. مش بفنجانك .. لكن بعيونك
انت ما فيك تتطلع بعيوني .. لأنك جبان .. بس أنا بطلع بعيونك وبقرأهم سطر سطر
وبعرف انك تايه بين السطور وبتتخبط مثل أمواج البحر .. وبتدفن حالك داخل موجة
.. كل فكرك عن عيني تخبيك .. ما حزرت .. الموج كشفك أكثر .. وانت ما فيك عني
تتخبى لكن .. هي محاولات يائسة منك لذر الرماد بالعيون انك هناك .. مسافر ..
مغادر .. مهاجر .. وأنت قلبك ما تزحزح من هون وعينك ما فارقت حرف من الحروف .. لكن شو بدي أقولك .. هذا فنجانك اللي بيحكي .. تركته هون .. نسيت تأخذه معك .. تخبيه .. تركبه الموج معك .. خفت يكشف أمرك ويقول للكل .. ما تصدقوه .. هو معكم لكن قلبه هناك .. خليني أطمنك فنجانك هون لكن عيونك فضحت المستور وهلأ بعد ما تعرف انه حتى انا اللي ما بعرف أقرأ الفنجان .. واللي ما بعرف أفك الخط .. قرأت عيونك سطر وراء سطر .. ما لقيت فيها الا العذاب .. عمر الهروب ما حل مشكلة .. عمر الاختباء ما حل مشكلة .. مرة واحدة ارفع النظارة عن عيونك وشوف منيح .. احنا كلنا شايفينك .

وصحتين على القهوة