أزجال بيرم التونسي (1)
زجال تونسي – عاش في مصر- توفى بها عام 1961 (عن 68 عاماً)
منحته مصر وسام العلوم والفنون من الطبقة الأولى
الجنازات
بفعل أهل البلد , أهل البلد تتحبّ
وبفعل أهل البلد , أهل البلد تتسبّ
ياكاتب الموت على اللي هب ودب
كل الأمم سلمت لك بالقضا يارب
وإحنا , يموت "سبعنا" الغالي حبيب القلب
نندب عليه ندب , يكفي ميتين الحرب
أحسن يقولوا العوازل , مات موتة الكلب
ومن قديم الأزل وإحنا على دى الكرب
مفيش جرادل فنيك يامسلمين تنصب
على الجنازة اللى تطلع بالصوات و الندْب
البلاج
الشعب نصه الجميل نايم عليك يا بلاج
تمتد له العين ويتصور في كل "ايماج"
أجسام إذا كنت أوصفها بشكل صريح
يحتج حزب النسا ويقول لي يا قبيح
دي بنت مصر اللي عاشت من زمان في سجون
إتشمرت للحياة .. زي الأوربيون
يابو العيون اقفل المحضر , وأنا وياك
من يغضب الله لا يخشاني ولا يخشاك
وجدنا " آباءهُن" كلهم راضيين
وشفنا " أزواجُهن " جنبهم نايمين
يا شرق
يا شرق فيك جو منور .. والفكر ضلام
وفيك حرارة .. ياخسارة .. وبرود أجسام
فيك تسعميت مليون زلمة .. لكن أغنام
لا بالمسيح عرفوا مقامهم .. ولا بالإسلام
هى الشموس بتخلي الروس كدهو بدنجان ؟
تحياتي .. من أشعار بيرم التونسي - مكتبة مدبولي -القاهرة