يوم تسعة وعشرين شعبان
نتطلع لهلال رمضــــــــــان
لجهاد النفس الأمـــــــــارة
وعطايا البر الحنــــــــــــان
نتطلع.......
لستاير الرحمة المرخيـــــة
لليالي الغفران الجـــــــــاية
لنسايم جنة رضـــــــــــوان
واتذكر.........
واتذكر ف اليوم دا حاجات
لواقولها أحتاج لساعـــا ت
بالـذات
وانا طفل صغيـر
ف شارعنا تعاليق ورايا ت
وتهاني ولا يوم العيـــــــــد
الكل سعيــــــد
والخلق قلوبها بتتعــــــانق
الناس م الفرحة بتتســـابق
وبتتمنى.........
وهو مر العام وبتســــــــتنى
الغايب برجع ويعــــــــاود
يا مراود.......
يا مراود بالكحل إتوصـــــى
يا عيون للسما طلى وبصى
دا عزيز ومفارق من مــــدة
والليلة ح يظهر ويبـــــــــان
يوم تسعة وعشرين شعبـان
واتذكروانا طفل صغير
كان ليه أصحـــــــــاب
من سني أو يمكن أكبر
أو أصغر منى بشوية
ف العصرية
نتغدى ونخرج للشارع
عند الجامع
ونقابل عم الشيخ رمضان
نسأله ح تسحر م الليلة
ويقول جايز
بالطبلة أنا جاهز ما اتاخر
والفايز منا يقول اسمه لما يسحر
روحوا دلوقتى يــــــــا أولادي
وإن هل ح جلكم ف ميعادي
دنا أكتر منكم متشوق
والطبلة كمان
يوم تسعة وعشرين شعبان
نرجع قوام قبل الغروب ....
قبل المسا ....
والشمس ماشية مروحة
ومفرحة قلب الولاد
ساعة ما ييجى الأب ومعاه الفانوس
ع الأيد نبوس
شكر وأدب
حب وتعود م الصغر
والأم تاخد عن ايديه كيس الياميش
ينسى التعب
لما يطل ف وشها
يلقى العينين بحرين حنان
ترفع إيديها لربها
تدعى بسعة الرزق وبطول الأجل
واحكلكوا إيه اللي حصل
لما المذيع ف الراديو قال
هل الهلال
شلال وفاض ع المسلمين
مين ف الأهلة يشبهك..ما تقولي مين؟
شهر التجلي والمنح
والعبرة مش مسك السبح
العبرة تقوى ف القلوب
يا عاصي توب
وابدأ من الليلة الجهاد
رب العباد
باسط ايديه بالمغفرة
ف كل وقت وكل حين
ما توحدوه يا مسلمين
ما توحدوه يا مسلمين
ما توحدوه يا مسلمين
شعر: محمد العقاد