[د. ناصر شافعي]

الدرس إنتهى .. لموا الكراريس
الشاعر الزجال الراحل : صلاح جاهين

فى صباح يوم الخميس التاسع من شهر أبريل لعام 1970 :
(إسرائيل تغير بطائرات الفانتوم الأمريكية الصنع على مدرسة بحر البقر الابتدائية بالشرقية)
(استشهاد 30 تلميذاً فى غارة إسرائيلية)

كتب الشاعر الكبير صلاح جاهين رائعته (الدرس انتهى لموا الكراريس) مسجلاً تلك المجزرة البشعة فى ذاكرة الشعر العربى والأغنية العربية ولحنها الموسيقار سيد مكاوى وحملها صوت الفنانة شادية لضمير العالم:

[align=center][table1="width:80%;background-color:black;border:4px solid red;"][cell="filter:;"][align=center]

الدرس انتهى لِمّوا الكراريس

الدرس انتهى لِمّوا الكراريس
بالدم اللى على ورقهم سال
فى قصر الأمم المتحدة
مسابقة لرسوم الأطفال

إيه رأيك فى البُقع الحمرا
يا ضمير العالم يا عزيزى
دى لِطفلة مصرية سمرا
كانت من أشهر تلاميذى

دمّها راسم زهرة
راسم راية ثورة
راسم وجه مؤامرة
راسم خلق جبارة

راسم نار
راسم عار
عـ الصهيونية والاستعمار

والدنيا اللى عليهم صابرة
وساكتة على فعل الأباليس
الدرس انتهى
لِمُّوا الكراريس

إيه رأى رجال الفكر الحر
فى الفكرة دى المنقوشة بالدم
من طفل فقير مولود فى المر
لكن كان حلو ضحوك الفم

دم الطفل الفلاح
راسم شمس الصباح
راسم شجرة تفاح
فى جناين الإصلاح
رسام تمساح
بألف جنــاح
فى دنيا مليانة بالأشباح
لكنها قلبها مرتاح

وساكتة على فعل الأباليس
الدرس انتهى لِمُّوا الكراريس

إيه رأيك يا شعب يا عربى
إيه رأيك يا شعب الأحرار
دم الأطفال جايلك يجرى
يقول انتقموا من الأشرار
ويسيل على الأوراق
يتهجى الأسماء
ويطالب الأباء
بالثأر للأبناء

ويرسم سيف
يهد الزيف
ويلمع لمعة شمس الصيف
فى دنيا فيها النور بقى طيف
وساكتة على فعل الأباليس
الدرس انتهى لِمّوا الكراريس

[/align][/cell][/table1][/align]