[عادل عادل]

في تساؤلات بتخطر على بالي :
هل من الصعب يكون الواحد ماشي بالشارع يشوف واحد مكشر حزين يتوقف قليلا ويقول له : يا رجل ابتسم الحياة ما بتستاهل ... كل مشكلة والها حل ...
هل من الصعب أن ترتاح لشخص معين وتحكي والله يا رجل حاسس حالي بعرفك من سنوات شو رايك بفنجان قهوة ( مش لطق الحنك ) بس لاني ارتحت الك ...
ليش بنفهم احيانا عفويتنا وصدقنا على انه ( مش في محلها ) هل السبب هو خوفنا شو ممكن الناس تحكي او شو تفكر ... يا عمي الواحد فينا على ابواب الخمسين ... شو فاضل من العمر ...
البساطة والطيبة والعفوية عشتها في حارات القدس القديمة ... كانت الناس بتحب بعض وبتسال على بعض ... وبتشعر وبتراعي ظروف بعض ... كانوا متل عيلة كبيرة ...
شو اللي صار بهالدنيا ... ليش انقلبت الموازيين ... والله كنا بنخاف على بنت الجيران كانها اختنا ... يمكن مسلسلات حب بنت الجيران ... وانها الجامعة للحب ... ضيعت مفاهيم كتير حلوة ...
ما بعرف ... بس برايي الحياة قصيرة وما فيها شي بستاهل نلبس اقنعة ... ونتجمل بعيون الاخرين ... الدنيا متل ما هي بس الناس اللي بتتغير .. ومع الوقت بتلاقي حالها غريبة عن كل شي ...
عشان هيك بعيش الواحد غريب عن الناس ومع الوقت بلاقي حاله صار ... غريب عن حاله ...
على فكرة انا بالحياة قليل الحكي ... ما بحكي كتير ... وما بعرف ليش بحكي وبكتب هلاء ...