الحب كلمه من حرفيــــن .. تسعِد قلبيــــن
وتخلي خط العمر يطول .. ويعيشوا سنين
يبقى البشر من حواليهُم .. وماهوش شايفين
والدنيا تتزين ليهُــــم .. هُمــا الاتنيـــــــــن
فرحانه بالحُب وبيهُم .. من دون النـــــاس
الحُب كلمه ومحمومه .. بتشِع حنــــــــان
تشفي القلوب المهمومه .. وفرحتها تبـــان
بالابتسامه المرسومــه .. بكل الألـــــوان
لو فيه غراب أو فيه بومه .. فوق الأغصان
الحُب يجعلها ف نومـــه .. غرقانه نـُعـاس
لمـــا الحبيب يلقى حبيبُه .. فرحـــــان ويَّاه
السهم في القلب يصيبُــــه .. يخليه يهــــواه
لا يوم هيغـْدُر ويسيبــــه .. وحدُه ف دنيـاه
ولا يوم يحــــاول تعذيبه .. ويصنع بلـــواه
ويكون شعوره انه نصيبُه .. أجمل إحساس
والدنيا تبقى مش سايعاه .. ولا حتى الكــــون
لمــا الحبيب بيطير في سماه .. الكل يهـــوُن
وان غاب في يوم عنه أو تاه .. بيكون مجنون
يدعي لربُه ويترجــــــــــاه.. بدموع العيــن
إنه هيشرب لو يلقـــــاه .. المُر ف كــاس
الحب أحاسيس م الجنـَّه .. بنتمناهــــــــــا
تتقال بأشعــــار تتغنـَّى .. يا محلاهــــــــا
كلمه ومشحونه بمعنــى .. وفيها الآهــــه
يامـــا انتظرنا بأشواقنا .. بنستناهــــــــــا
تتقال بصوت وتريّحنـا .. أو بالأنفـــــاس
الحُب مش شك وغيـره .. أو بــــــالإذلال
الحب معانيها كبيـــــره .. بتهز جبــــــــال
مش بس بنقولها ف سيره .. تيجي ع البال
لاكنها زي الصـــــوره .. مليانه جَمَــــــال
فيها الحبايب معزوره .. وتنشال ع الراس
***********