السلام عليكم .. مجرد رأي
كلام من قلبي
....
إمته يا أمه نقوم نتطـّهر..؟
...........
بحاول إني
أنسي همومي
أعشق يومي
واعيش متهني
للدنيا أغني
فجأه الاقيني
الدمع فْ عيني
تاخدني العزّه
تجرحني بغـزّه
تألمني فْ نني
ودا إكمني
حافظ كل تاريخ الأمه
وصاينه بذمّه
ومزودني
شرف ومعزّه
وفجأه أشوفني
العزّه تفوتني
تهرب مني
تسيبني فْ حيره
أعيش نـِسْياني
وارجع أفكر
ليه تنساني
وتبعد عني
وافضل أدوّر
ولمّـا اسألني
الاقي فْ قلبي
يهيج بركاني
وعقلي الباطن
ألقاه يهملني
وضميري بجرأه
يعاتب فيّا
والاقي عنيّه
كتير تسألني
إنته بتنسي .؟
إن الأمه
نسيت غزه
وقابله تعيش الذل بلذة
وعايشه يادوب
تسأل فين الكاس والمـَزّه
وفين المُــزّه..؟
علشان تيجي تهز الهزه
تلم اللمه
تنهي وتؤمر
نمضي ونبصم
وتنفـّذ أوامرها بذمّـه
تسجن جوّا قلوبنا الكلمه
ويبقي شعارنا فْ كل أوان
صمـٌّن بكمـٌّن
مهما الغوله كانت فظـّـه
وبلاش نعلن
عن مصايبها
يمكن ترضي عنا وتغفـر
أصل غضبها
هايكون قاسي علينا وأغبر
يسْـكُنـّا الخوف
ونعيش في كهوف
لو فكرنا فْ يوم نتحرر
إمته يا أمه نقوم نتطـّهر
نصلـّي جماعه فْ كل أدان
نرفع رايةْ النصر الأكبر
كل اولادك واقفه وجاهزه
علشان ترجع تاني العِـزّه
يرجع تاني الأقصي يكبّـر
جوّا القدس نعيش ونطـهّر
كل تراب الضفه وغزه
إمته يا أمه
تفزّي الفزّه
تغزّي الغزّه
علشان ترجع تاني العزّه
وترجع تاني القدس وغزه
............
أشكركم
وللجميع تحياتي