[ضياء الدين البري]

السلام عليكم .. مجرد رأي
كلام من قلبي


من غير دليل

........


هوّا انت مين .؟
وفْ نيتك توصل لفين.؟
عشان تجيب سيرة الحمير
هوّا انت عشت فْ وسطهم.؟
علشان تزيد وتعيد كتير
حاولت تقــْرب منّـهم.؟
وفهمت شيء من طبعهم.؟
إوعاك تفكر زيّهم..
لأنك انت عكسهم
واقبلها مني
وبلاش تلومني
لأني عارف إنّـهم
نسيوا الزرايب
والطوايل
والغيطان.؟
قلعوا البرادع
والحوافر
واللجام.؟
نسيوا السّـقِـيـّه م الترع.؟
خاصموا النهار
واتعلموا فنون السهر
وكمان لقيتهم أدمنوا
نفخ السيجار
مايـْهمّـش اللون والثمن
دا أصل نوعه مفتخر
ودول كمان صاحبوا الزمن
ساعدوه علي جلب المحن
وتقاوي طارحه كتير عطب
زرعوها في قلوب البشر
هرسوا المعسل ف العجير
زرعوا الهباب جوّا الشعير
بعد النجيله والدنيبه والحطب
فجأه لقيتهم بدّلوا
أكل النـُّخاله بالفطير
من بعد خيش
يدّاروا فيه ، وقت اللزوم
عرفوا طريق شـُرْب الحشيش
والبردعه متفصله
من خيط حرير
وتـْلمّعوا
وتـْقمّعوا
عالشط زاطوا ولعلعوا
عايشين حياتهم أبـّهه
سُـكـْر وحداقه وزهزهه
والمرمغه فوق الرمال
نسيوا وتدهم ع الحيار
في الكارو سايـْقينـْهم عيال
وفي الدواره ع الـمدار
وعالنوارج
يأدّبوهم بالشِّـعَبْ
نسيوا الشقارف
والمحشـّه والبـُلط
ناف السواقي والغما
ملـْس القنايه والشادوف
حرقوا الكمامه
والعمامه
وفلانكة الطنبور
دفنوا النهيق جوّا القبور
واتعلموا فن الخُـطب
داسوا الكواكب في السما
نسيوا المناجل والرّوال
فوس الشراقي والوتد
والمدْره والمحرات
وإمته يكون ، وقت الحصاد
قلعوا خلاص زعب الغبيط
دول نسيوا حتي إسم غيط
يبقي انت ليه.؟
من غير دليل
بتقول كلام
يشغل قلوب ، والشك فيه
ياعم داحنا اشبعنا لوم
عايز نهارنا يبقي ليل.؟
والليل وراه تيجي الغيوم.؟
عصافير وننسي الزقزقه.؟
والخيل يبطل دقدقه.؟
ماكفايه حقد ع الحمير
أصل الحياه ، مش ناقصه زوم
والشمس طافشه م الهموم
دول حلف عايش خندقه
مملكته حلوه محندقه
عايشين حياه مترستقه
ويّـا الديابه والتعالب والقرود
حتي الجوارح والزواحف والفهود
بـس الأسود
جوّا الحديد ، متلجمه
وكتير صحاب من كل لون
أصل الحياه متقسمه
نرضي الإله ، كله يهون


.........

أشكركم
وللجميع تحياتي