[فتيحة الدرابي]

سولت امي منانة
احياتها احسن ولا أنا
جاوبتني أو قالت:
سيري يا لهبيلة احياتك كلها اغبينة
دارك ما اجلست فيها
واحياتك ما اعقلت اعليها
اخداتك احلامك لكبيرة
اتحملت مسؤولية ما قديت اعليها
اركبت اسفينة
وامشات بيك ابعيدة
ارماتك في اجزيرة
اجزيرة بلا بيبان
محلولة فيها كل الطرقان
ابقيتي تايهة وتاه بيك الزمان
جاوبتها وقلت لها:
آمي منانة، حياتنا متحضرة وساهلة
ما نسكيوا الماء من البير
ما انطحنو اطحين
احقوقنا كلها اتمتعنا بيها
والقيود اللي كانت امكبلانا
كلها اتحلت و الترمات مورانا
والعنف ضد المرة قل في ازمانا
والجهل ما ابق في صفوف نسوانا
وما بقينا لقمة ساهلة لرجالنا
واصبحنا اليد اليمنى لولادنا
والراجل ما يقرر حتى ياخد رينا
وشاركنا في جميع الميادين
في الطب في التدريس في الرياضة
وسقنا الطيارة أو اوصلنا حتى الوزارة
جاوبتني امي منانة
حياتك آبنتي زربانة
وخوفي اعليك من ديك المدونة
ما اتزوجات المرأة الهجالة
و ما فرحت البنت المسرارة
أما الرجالة من الزواج صبحت هربانة
آشن اخديت من هاذ الحضارة والتقدم
غير الأمراض والهموم
قلت لها: آمي منانة
خليني عليك راه ازمانا ما هنانة
انسايروه آمي منانة والله يكون معانا .
فتيحة الدرابي