رسالة بردانة وحروفها مش دافيه
العيشة مش عافية
ياللي انت مش عارف
دا بتبقى حضن في حضن أمان ،
والبيوت دافيه
ما تمسكهاش إذا كارهه
متجبرهاش تكون وافيه
ماتت من زمان حنيتك ليها ،
مكانتش أصلا موجودة لولا عنيها
على عيونك خدت المقاس ورسمتها ،
وبكل كذب على روحها وصمتها ،
بتكذبي ليه ؟؟
كانت مصرة ومصممة
تصنع أميرها ف ناس حافية
والحافي ماقصدتش الفقير ،
الفقر أكرم وكام فقير
تشوف غناه
لو مش معاه
في طرف عينو وهيبة لقاه ،
في عفتو ورزانتو ساعة لهفتو ،
والفقرا من زمان في عنيها ناس طيبة ،
ناس صحيح على أدهم لكن القلوب صافية ،
الفقير فقير المبدأ والخلق والنفس فيه جافيه ،
وشره دايما نافي خيره ،
وخيره هالة كذابة ف خيال حقيقته منتفية
أما أخينا من مبادئه
إللي بيرفض الإهانه ذلو ،
تزيدو ليه لو تقدر تقلو
خليه يموت من التعب ،
واوعاك كلمة مالك تقولو ،
ما تريحوش
هي كانت استراحة دا احنا غابة من الوحوش
خليه يقوم من محنتك يلاقي نفسو في ألف حفرة
ماسك في مية شفرة ندم ،
عمال يقطع قلب روحو ،
ويحوشلك لحمة جروحو
يمكن تشبعك
ويقول أخينا الوحش لينا في لحظة ضعف مصطفيه
هو انت ازاي بتعترض على حاجة ليها انت اتخلقت ؟؟
وفيها إيه ما تتخنق ؟تسكت وما تقولش اتخنقت
ما تتزنق تضيق عليك نفسك وأنفاس دنيتك
ما تقولش أوف أنا اتضايقت ،
أو تقول إنك طهقت
أو من كتر الضيق زهقت
إياك تعبر أو تفضفض ، أو تهلفط بالكلام ،
هتلاقي صفعة مستنياك إيد اللئام ،
هتلاقي العقوبة من إله بيتخلق زيك تمام ..
وإياك تفكر تسألو
مين اللي خلاه يكون إله من الغشم ،
مين عليك كان جرؤو،
مين ادالو فيك العشم ؟
مين فهمو مين علمو سباق الطغاه ؟
وادالو غلطة في شكل خلطة
لكل سم وأقنعو إن دا هو العسل ؟
في فرق كبير يا سيدنا بين إلهك
في السما إللي هو احنا عبيدو ،
وجاي جاهل من عبيدو بيقلد في سيدو وعامل فيها الحكيم تشريعو
من هواه ،
وظلم الناس هواه ،
شيطان فاضي غواه
سول إليه سهولة الحكاية .
اللي بنت تيه في الزوايا ،
وألف سور ومشنقة
ف حبلها مات الولد
واللي مات منو الضمير
كان لسه مفكر نفسو عايش !؟
خليه مفكر
دا الله أكبر
من عمايله من سمومه
وفي يوم أكيد هيفوقه
بكرة تعرف أن سمك مش عسل
وإن ظلمك مهما طال بيه المدى ف له أجل ،
كل الحكاية شوية صبر من أيوب ،
على دعوى من يونس تداوي قلوب ،
وصمتك بعيوني يا أبو يوسف وشكوتك
بإذن الله على لساني بثت فيا الأمل..