منتديات نور الأدب

منتديات نور الأدب (https://www.nooreladab.com/index.php)
-   الرواية (https://www.nooreladab.com/forumdisplay.php?f=166)
-   -   حكاية مش للكل معروفة .. (https://www.nooreladab.com/showthread.php?t=20236)

منى كبارة 22 / 05 / 2011 52 : 03 AM
حكاية مش للكل معروفة ..
 
http://up.3ros.net/get-5-2011-n5hiwpus.gif




من مكتبتي ..اخترت لكم هذا الكتاب باللغة العامية للكاتب عادل القنصل الذى يتميز بالبساطة في أسلوبه..

مايثير الاعجاب في هذا الكتاب هو فكرته البورسعيدية الخالصة فهو ينبش في الأيام التي كدنا ننسى أخبارها..

أيام الزمن الجميل ..حيث نجدنا نعيش بعشة عند البحر ومعنا شبكة وأيضاً ريشة نطلي بها الشخصيات بألوان

الحب والإخلاص ..فمع العاشق البورسعيدى دعونا نتجول في كتابه ( حكايات )..

سنبحر معاً في تاريخ مصر القديم ونقول للي مايعرفهوش ..آدى تاريخ مصر ..واللي عارفه ونسيه ..نفكّره بيه..

ونبدأ حكاياتنا..


http://up.3ros.net/get-5-2011-ay3uuax0.gif





الناس الطيبين على رصيف سيبس

...................



رصيف دليسبس ..أو زى مابيقول عليه الناس الطيبين ..في البلد الطيبة رصيف سبس..

الرصيف ده كان أحسن كيف في الصيف ..وطوله يقرب من الكيلو ..وله جانبين من الحجر المتين ..الناس عليهم دايماً قاعدين ..واحد منهم بيبص على القنال ..يمين وشمال ..والتاني بيبص على أرض ..كانت زمان خلا..ودلوقتي فيها المتحف اللي بالآثار إتملا..ومحلات ومطاعم وفنادق ..وزمان كانت معسكرات وخنادق..والموجود من سبس قاعدته..بعد الناس ماشلته..

صحيح هو المهندس اللي هندس للقنال ..لكن اللي حفرها العمال من صعايدة وفلاحين..ناس مصريين ..وهو مثال للإستعمار .. ومهما كان له عمار..لكن مش كل اللي بنى عمارة ..بقاله فيها حق الاإدارة..



والرصيف في الصيف ..بيبقى أمم من جميع الطبقات..وياما قعد عليه ناس قمم..كتبت عنه.. ورسمته وصوّرته..

وصورته زمان لسه في خيالي ..لما يقفوا على سلعة بتوع التسالي ..فول سوداني ودوم ولب ..والناس تتسلى وتنسى الهموم..والعربيات منوّرة بالكلوبات اللي برتينه..وكأنها أجمل سفينة..

واللي قاعد ناحية القنال مادد رجله على السلك اللي بيفصل الرصيف عن القنال ..أصلها منطقة جمركية ..

ومهما الكل كانوا ولاد حلال ..لكن الأمر مابيسلمش من المسلكاتية ..وكل بلد فيها إللي مكفيها..دى نفوس بشرية ..



وتلاقي هناك صاحب العيال..ومعاه مراته وعياله..والواد الصغير شايله عشان يبص على السفن وهي معدية..دلوقتي صديقة وزمان كانت معادية ..

والواد ماسك كوز الدرة والبنت ماسكة جيلاتية ..ووشها سبحان الله آية ..والجيلاتي في سندوتش ..معمول مخصوص من البسكوت ..والأم هات للواد لحسن عليها هيموت..ويعدى ويفوت بتاع الكازوزة ..منها البلية والبيبسي الكبيرة بتاعة زمان..تشرب منها وتقول كمان..عشان تكفي تلت غُلمان..وإلا الترمس والحلبة ..وبق ميه من القلة السقعانة..





والحبيب والحبيبة ..خطيب وخطيبة ..مخشبين مع بعضهم.زيعني ماسكين إيدين بعضيهم..وفي الجو الجميل يحلى الكلام والمواويل ..وساعات شِعر وزجل في وصف المحبوبة ..وساعات يزعلوا وتبقى الطوبة في المعطوبة ..والمعركة بينهم منصوبة .



المهم إن الناس كلهم ..اللي قاعدين عليه..أحلامهم بسيطة .زده بمبوطي مستني مركب يرزق منها..وده صياد مستني وقارة أو لوتة يبيعها أو يتعشى بيها.. ويفوقوا من أحلامهم كل مرة على غارة ..وتضرب الصفارة ..وإلحق ياعم شبارة ..الحرب قامت ..وأحلام كتيرة ماتت..

بنت مغاورى كانت هتتجوز حندوقة ..وسبوع بنت الريس أوبص الليلة ..ومتجمعة كل العيلة ..

الناس كلها ماشية في حالها ماتعرفش إيه اللي بيجرالها..وقامت حرب ورا حرب ..وبين كل حرب الناس تتجمع ع الرصيف وتطلب أيام الحرب ماترجع تاني ..بس البلد دى أم القنال..والطمع من العدو فيها مش هيسيبها في حالها ..ولا هيسيب أهاليها ..وبطولات ومقاومة شعبية وتاريخ مسطر ومعطر لازم ينحكي ..

وأنا عشان عشت في البلاد دى أكتر من كل البلاد ..وفيها أجمل زاد وأحسن عباد لربهم دايماً فاكرين وبحمده مسبحين..

ويابورسعيد يانني العين هأحكي اللي أقدر عليه من حرب ستة وخمسين لحد ماالناس رجعت ليكي..سالمين غانمين في أربعة وسبعين ويارب يامعين..أكون في حكاياتي من الصادقين ..حتى لو كان فيها بعض الخيال..ماهو الحلوة الجميلة ساعات بتحتاج لخلخال يزين جمالها الرباني ..أصل نصي الحلو التاني ..هي وجزورها منها..وبذورها الزهرتين بتوعي زى فلها وياسمينها..لهم فيها ميلاد وحياة ..ربنا يبارك فيهم زى بلدنا مصر أم الحياة..





أساور من معدن

....................



قبل الحكاية ..وقبل مانخش في حروب بورسعيد المعروفة ..كان فيه حكاية مش للكل معروفة ..

في الحرب العالمية التانية ..سمعت حكاية عجيبة من راجل صادق ..عاش حكايتها ..لما الانجليز في بلدنا كانوا موجودين ..واحنا دايماً حالفين ..نخرجهم من بلدنا ..وقصص المقاومة كتير.

وذخيرة الحروب جت في القنال على مركب انجليزى ..واتحولت في صناديق كبيرة ..وعمال الكله صعايدة وأعدادهم غفيرة مسلمين ومسيحيين..الواحد بخمسة صاغ يشتغل طول اليوم من غير أكل ..وإجبارى الصوم..وعمال الكله بتبقى مجموعات يشتغلوا مع بعضهم ولهم قائد بيوجههم..يعني زى عمال التراحيل ..

والذخيرة مطلوب لها الرحيل من القنال الداخلي ..إللي مكانه محطة غاز تموين العربيات ..بعد ماالقنال اتردم في التمنينات ..

والعمال كل واحد منهم في إيده إسورة من معدن ..وتعتبر زى التصريح أو رخصة التشغيل ..عشان ماحدش وسطهم يخش وللذخيرة يقش .



والعمال ابتدت تنقل الذخيرة إللي في الصناديق ..وعلى كل صال فريق والعمال بيقولوا عليه ماعون ..وهو يشبه المعدية بس غويط ..ياخد بضايع كتيرة ويمشي في الميه مجرور بلنشات.



وتحصل المصيبة ..العامل عسران ..جاله تعب في المصران ووقع بالصندوق وسط الصال ..وإللي شاف وروى ..قال بعيد عن السامعين والشايفين..فرقعت الذخيرة واتنقلت لباقي المواعين ..وجهنم ونارها..ودقت شرارها ..ومسكت في كل اللي موجودين ..وكأنها حرب قامت ..

الناس صحيت مانامت والنار في السما عليت ..وشافها أهل بورسعيد كلهم لما شافوا أشلاء عِمامهم وخِلالهم..من عمال الكله..طايرة من القنال الداخلي لشوارع المدينة ..

لما لقوا الأساور إللي مكتوب عليها أساميهم في إيديهم..دى إيد صموئيل ودى إيد أبو سكينة المسكينة.. إللي مستنية أبوها بعد شقا يومه ..يعني أشلائهم طارت واتبعترت حوالي خمسة كيلو ..والناس الطيبين يصرخوا ويقولوا شيلوا ..آدى اللي جالنا من العدو ..يحارب عدوه على أرضنا ..بقى ده يرضي ربنا!.





http://up.3ros.net/get-5-2011-4cqi7wzx.gif

نصيرة تختوخ 22 / 05 / 2011 35 : 01 PM
رد: حكاية مش للكل معروفة ..
 
جميل ما نشرت هنا يا منى حكاوي مصرية باللهجة المصرية الجميلة.
فعلا البساطة و الطيبة المنثورة بين الكلمات و عفوية المصريين تحببهم للقلوب.
دمت بكل الخير و دام نشاطك.

منى كبارة 22 / 05 / 2011 32 : 05 PM
رد: حكاية مش للكل معروفة ..
 

[gdwl]

شكراً لمرورك الكريم وردك الجميل يانصّورة
نورتي حكاياتنا ..
سعيدة جداً إن الموضوع نال إعجابك
جهّزت الجزء التاني وهنزله حااالاً

لكِ خالص تحياتي وتقديرى
مع أجمل باقة ورد ..بالود مرويّة..


[BIMG]http://up.3ros.net/get-5-2011-en7wiiz8.gif[/BIMG]



[/gdwl]

منى كبارة 22 / 05 / 2011 34 : 05 PM
رد: حكاية مش للكل معروفة ..
 


http://up.3ros.net/get-5-2011-maze6jod.gif


صباح الخير عليكم جميعاً
اسمحوا لي
نتابع معاً الجزء الثاني..
http://up.3ros.net/get-5-2011-ay3uuax0.gif
الإنجليز ..آذيّة ورزيّة

......................



في الأربعينات ..وفي بدايتها..حكت أم عفاف حكايتها..لواحدة جارتها..عن تعب جه لبنتها عفاف ..وشارت عليها بطيبة وتلقائية ..تزور الشيخ القابوطي..وجهزت نفسها وحددت اليوم ..وفي نفس اليوم أبو الطيب كان رايح يصطاد غرُو حمُراي ..من المنطقة اللي عند القابوطي..

واليوم كان صباحه جميل وهواه عليل..وركبت أم عفاف الترولي اللي كان له خطين ..واحد للجبانة والتاني للقابوطي..وكان زى عربية التروماي ..وبيمشي على قضيبين ..وبيجره بغل أو اتنين ..وركب معاها كمان أبو الطيب وابنه معاه..وأمله ومنتهاه يصطاد مع أبوه..






http://up.3ros.net/get-5-2011-eccprvka.jpg







وفي نص السكة للقابوطي ..سمعوا فرقعة جامدة ..قالوا فيه إيه ؟!..قالوا قوات الإنجليز مش هامدة ..وفاكرة نفسها جامدة ..لما سلطوا مدافعهم على الطيارات الألماني ..اللي رمى كام طوربيد ..واحد كان في سكتهم..والتاني في وسط البلد..وقوته كبيرة وحمولته مصيبة ..والناس كلها صرخت ..وقالت إحنا مالنا ومال الحرب..يعني الإنجليزي مش مكفيهم محتلين أرضنا ..هيحارب كمان عدوه على أرضنا ..بالذمة ده يرضي ربنا!..



وقعدت عفاف وأم عفاف يعيطوا من الخوف..إنجعزوا من صوت الطوربيد ..وأم عفاف تدعي وتقول ..شالله ياشيخ قابوطي..إحنا رايحين لك ومتعشمين فيك ..كويس إن بركاتك سترتها معانا..ده إحنا كنا راكبين الترولي بوشنا ..لاقينا نفسنا فيه بقفانا ..وكفانا إللي جرى ..والتروللي رجع تاني لورا..ماهي حرب عالمية ..والمضرور ولاد بورسعيد الأبية ..




http://up.3ros.net/get-5-2011-ope3e667.jpg





وصفصف إبن أبو الطيب ..عمّال يعيط ..الرحلة حلم وماكملش ..وللغُر والحمُراى ..مالحقش ..وسأل أبوه ..إيه اللي حصل ياآبا..قاله يابني ..طول ما الإنجليز قاعدين في بلدنا ..زى الرزيّة..مش هيجيلنا من وراهم غير الأذية ..






الأم الطيبة ..أحضانها للكل

...........................



بورسعيد ..لماكانت زمان الفُرما..فتحت دراعاتها وأحضانها ..لكل اللي هيعمّر فيها..من حفر للقنال ..وتعلية لمبانيها..وجالها الناس من كل البلاد ..قاصدين الرزق من رب العباد..من الصعيد لبحرى ..والكل عليها يجرى ..ويدوب فيها..وإتكوّنت بورسعيد بأهاليها..بقُم ولادها..وولادهم حملوا رايتها ..وكوّنوا قوميتها..ولما تسأل حد..انت أصلك منين ..يقول أنا منها..ويحلف بدينه ودينها..ومايقدرش يبعد عنها..وحتى لو زار موطنه الأصلي ..يرجع لها بسرعة وهي وحشّاه..ويشم ريحتها من بُعد..أول مايدخل حدودها..وده سبب استمرار وجودها ..اللي عايشين فيها بيحبوها ومتعصبين ليها..في رياضتها ..وفي أكلها وشربها..وهو في حد يلاقي أجمل من أكلها..ولا حد يلعب كورة زى ولادها من أيام الكورة الكاوتش ومباريات عند المسلة ..لما كانت الناس تحب تتسلى ..وعمر ماحد يحس فيها بالغربة ..سوا زاير أو تاجر له مصلحة فيها..





والبورسعيدى ..زى سمك بحرها مايعش اللا جواها..ولو بعد عنها بكام كيلو يحلف بغربته..عشان هي أهله وفيها أكلته وشربته..وماشفتش حد في البلاد إللي رحتها دايب فيها زى أهلها ..إللي تحس فيهم بطيبة الريف وأصالة وشهامة الصعايدة ..ونزاهة وعياقة ..من العيشة جواها ..ونسمة هواها ترد الروح للعليل ..وكرم أهلهاالقدام واللي موجودين..يدلوا الغريب على أى مكان عاوز يروحه..ويقوموا معاه بأحلى واجب ..وصباحين وحتة ياحبايب ..وفي السراء والضراء ..تلقاهم ..عشان حروب كتيرة عاشوها..وبلاد كتيرة جروا ليها..

وهي دى بورسعيد تلاقيها..في وقت الشدة ..لما تعد العدة وتضحي بأولادها ..شهداء لمصرهم وليها..





http://up.3ros.net/get-5-2011-9jnceu6h.jpg







مع خالص تحياتي..


http://up.3ros.net/get-5-2011-4cqi7wzx.gif

منى كبارة 26 / 05 / 2011 27 : 12 AM
رد: حكاية مش للكل معروفة ..
 


http://up.3ros.net/get-5-2011-vm7iyk43.JPG


مساء الأنوار..
وفي نفس الميعاد ..كان لينا لقاء
لنتابع معاً الجزء الثالث
ومع وش الخير ..عم عثمان النوبي
نبدأ حكايتنا الجديدة ..


http://up.3ros.net/get-5-2011-ay3uuax0.gif




خط سير ..وفاعل خير

...................



عم عثمان..راجل نوبي مولود في بورسعيد..وساكن في شارع أسوان ..وفي الأربعينات ..كان له خط سير يومي ..يخرج من بيته الصبح ويقول..ارزقني برزق يومي..ومشوار الصبح في الصيف ..وفي الشتا واحد..يروح جنب المينا..وعلى صدره صندوقه الخشب ..المتعلق في رقبته..وعليه أنتيكات وعقود..ويدعي إن المركب الإنجليزى تعود..ويستنى بحارتها على باب عشره ..أغلبهم يعرفوه ..ودى عِشرة ..




http://up.3ros.net/get-5-2011-mwiwskwu.jpg



ويطلع بعد كده على البيت الحديد.. إللي كان في شارع الجمهورية ..والكازينو إللي فيه يسهر للصبحية ..حركة بحارة وتجارة ..ويبيع وربنا يرزقه ..وبعد كده يخش على محل جيانولا إللي قباله..وهنية له لما يقابل الخواجة يني اليوناني..يرزق منه ..وبعد كده أرمنيوس الأرمانلي ..أصل بورسعيد كانت مليانة بالأجانب ..زى بر مصر في الوقت ده من الزمان..والكل يديله الأمان.


وبالليل يطلع على فندق وكازينو بالاس ..معاه الفل والياسمين ..والموسيقى والرقص اليوناني..ويبقى فيه خليط جميل من الروايح ..وانت واقف على رصيف سيبس..تلاقيه فايح.


وفي الصيف ..يطلع الصبح على البحر ومعاه الفل والياسمين ..يلف على كابا نون الغزل ..إللي كان زمان على البحر ..وبعد كده يطلع على كازينو الجزيرة في رحلته اليومية ..والرزق يحب الخفية ..وأجمل ذكريات.


وخط سيره ده استمر من الأربعينات لحد نهاية الخمسينات ..لما وصل من العمر للستينات..وكان سمار بشرته وظرفه ..حبب الناس فيه وفي هيئته..لحد رجله ماخانته ..وإتزحلق من على الرصيف ودماغه خبطت فيه..وأغمي عليه..ولما فاق لقى نفسه مابيشوفش ..حصل انفصال شبكي وإتهدد بالعمى .. والراجل رزقه يوم بيوم..ولو بطل يوم..العيال في البيت بالكوم.



وإبتدى خط السير من جديد ..ويرافقه فيه ابنه وجيد..وكل مايمر على الناس إللى تعرفه ..تشترى كل إللي معاه..صعبان عليهم ياولداه..بس لما حد يديله عطية لله..كان يبتسم وسنانه البيضا تبان..ويديهم مكانها اللبان..أصل نفسه عزيزة عليه.


وفي رحلة الصيف ..عند البحر..لما كان بيمر بين الكباين الخشب الأبّهة إللي اتحرقت أغلبها في ستة وخمسين..شافه الراجل الطيب..إللي كان من الناس المعروفين يعطي لله..واسمه مايبقاش من المذكورين ..حسنته خفيّه..وعيشته هنيّه..ولما إفتكره نادى عليه ..وخد منه كل الياسمين..وقاله انت من معالم بلدنا..ومن الناس الطيبين..وعليّا لك دين..انت فاكر لما خدت منك الياسمين من سنين ..كان عقد جميل ووشه علينا زين..لما خدت توكيل مركب ومدتها بالتموين..وفتحها عليا ربنا من وسع.. وإتفائلت بيك وبالياسمين..إنت فين ياراجل من سنين ..وطبعاً عم عثمان مش فاكر..ياما باع لناس كتير ..بس لما سمع إسم الراجل الطيب ..عرف أصله الطيب ..ده من أهل البلد المخضرمين..وحلف الراجل ميت يمين..وبإذن الله يرجعله نور العين..وإتعهد بعمل عملية له ..عند أحسن الأطباء في مصر ..بس طلب منه إنه مايذكرش إسمه..ويفضل إنه يكون فاعل خير..وربنا يكتر من أهل الخير فيكي يابورسعيد..


وإنكتب لنظره عهد جديد..يشوف بيه كل الأماكن الجميلة ..إللي كان بيشوفها في خط سيره..
وضاف لسيره رصيف سيبس..وندر يدي للأحبة والخُطّاب ..الفل والياسمين من غير مقابل ..
لأن إللي قابل فله وياسمينه بالخير ..حببه في فعل الخير..




مع خالص تحياتي..


http://up.3ros.net/get-5-2011-4cqi7wzx.gif

ناهد شما 26 / 05 / 2011 49 : 02 AM
رد: حكاية مش للكل معروفة ..
 
فعلاً يا منى حكاية مش للكل معروفة
حكايات جميلة وراقت لي
طريقة السرد السهل والسلس باللهجة المصرية
بالإضافة لهذه القصص انها هادفة
شكراً لك ولهذا المجهود وأتمنى أن تروي
لنا حكايات أخرى من مكتبتك
دمت بخير

منى كبارة 27 / 05 / 2011 58 : 02 AM
رد: حكاية مش للكل معروفة ..
 



عزيزتي الغالية ناهد..
سعيدة جدا لمتابعتك للقصة وأنها نالت اعجابك
أشرقت الصفحة بمرورك الجميل

واسمحلي لي الآن بتنزيل الجزء التالي من القصة

خالص تحياتي وورودى ..


http://up.3ros.net/get-5-2011-lfhxmp1z.gif

منى كبارة 27 / 05 / 2011 02 : 03 AM
رد: حكاية مش للكل معروفة ..
 


http://up.3ros.net/get-5-2011-zh72m4x9.gif



 نظرة وداع لرصيف سيبس
.....................
( الجزء الخامس )



http://up.3ros.net/get-5-2011-ay3uuax0.gif


الدكتور قال لأمي الحامل لازم تتمشي في الشهور الأخيرة ..وأبويا قال ياللا يامنيرة ..ناخد ماما عشان نمشيها..وكلها شهور وييجي أخوكي..ياللا ياعين أبوكي ..وكانت الفسحة والتمشية من ميدان المنشية ..لغاية رصيف سيبس..
المشوار طويل ..ابتدى من قبل المغرب لأول الليل ..وكان الوقت في آخر الصيف ..وكلها شهرين ونستقبل الضيف..وماما طلبت إزازة بيبسي وأنا طلبت جيلاتي..وبابا أكل حلبة وترمس وقعد يهمس..وماما تضحك..عشان بيقول لها أنا سامع حركة النونو..وقلت لهم أنا كمان عاوزة أسمع..أصل أنا ماسمعتش نفسي وأنا في بطن ماما..وياما شغلتني فكرة أخويا النونو..والهوا مرة واحدة برّد..وطفل مش عاوز يمشي ,,وبابا وماما قاموا وأنا في ديلهم .. وقبل ماأمشي بصيت على الرصيف .. لقيته بقى من الحركة نضيف ..وحسيت إني بأودعه..وقلبي كأن حد بيخلعه ..وروّحنا.

وجه الشتا..ودخلت المدرسة ..وكان الأستاذ بيكلمنا عن الإستعمار ..ومابقاش له في بلدنا قرار..وافتكرت إنه من سنه ولا اتنين..كنت بشوف قدام بيتنا اتنين واقفين ..لبسهم غريب ..وحديثهم أغرب ..
وأنا كنت بستغرب ..وأسأل بابا يقوللي الوقت قرّب..ومش حنشوفهم تاني..أصل دول من البحر التاني..ومافيش أيام وجم تاني..وملوا البلد ..وباقي أيام وييجي الولد..عشان سمعت من نينه..إن ماما قرّبت ..
ويوم وأنا رايحة المدرسة الصبح .. أكدوا إن النونو هيشرّف النهاردة ..وقعدت في المدرسة أحلم وأقول لصحابي ..هييجي أخ..ولد ..أبويا بكده وعد..وماصدقت إن الجرس ضرب..والمرواح وجب..وجريت في الشارع..عشان الحق أشوف أخويا..ياترى شكله إيه..وهيسموه إيه..المشوار بقى طويل..وحسيت إن جسمي النحيف بقى تقيل ..وسمعت صوت شديد..مش عارفاه بالتحديد ..وشوية النار ابتدت تقيد..ووقعت على الأرض ..
لقيت واحد عجوز بيشيلني ..وبيقومني..وقاللي على بيتكم اجرى ..الجبارين عملوها..ومش فاهمة كلامه..ولا إيه إللي بيحصل ..وجريت ومش عارفة أوصل..كأني للمدرسة رجعت تاني..

ولقيت الناس كلها بتصرخ وبتجرى ..وأنا في مكاني ..وقابلني عم عناني جارنا.. وخدني من ايدى قدامه على العجلة ..ووصلنا شارعنا بالعجلة ..لقيت شارعنا والع..بيت عم محمود وكمان الجامع..





http://up.3ros.net/get-5-2011-ldtwteme.jpg




وروحت بيتنا بالعافية ..لقيته كوم تراب ..وصرخت ..والناس يشدوني ..تعالي هتموتي ..يعني إللي جوه البيت ماتوا؟!..
أمي وأبويا ونينتي ..وأخويا النونو ؟..والعياط في عنيا اتحجر ..ومابقتش عارفة أفكر..واترميت على الأرض ..والجيران خدوني..ولما فقت قعدوا يبصولي ويعيطوا..

يعني خلاص كل شئ راح ..بيتي..وأسرتي..وكمان لعبتي..إيه فايدة دنيتي ..وإللي راحوا..على فين راحوا..ودوهم فين..ويعني إيه موت؟!..يعني مش هاشوفهم تاني..وبنت صغيرة زي ..عندها عشر سنين ..هتروح عند مين..وطريقها هيوديها على فين؟!..
عند أهلي في المنزلة ..بابا وماما منها..ونينه كانت عندنا في زيارة..ساعت ماقامت الغارة..
وعشت مع أهل بابا وماما..وكأن كل شئ كان حلم صغير..زي ما أنا صغيرة ..بيتنا ..ومدرستي ..أبويا وأمي..وأخويا إللي كنت بأسمع حركته في بطن أمي ..
وكرهت الإستعمار ..والحرب ..ومهما يوصفوهم بقسوتهم..مش هيكون أد إللي جرالي..
فين بيتنا..وبلكونتنا..إللي كان فيها عشة الطيور..ودولابي إللي كان له مراية بلور..والقطر إللي كان بيلف ويدور بالزمبلك ..كله هلك..وكانت سنة سته وخمسين..أصعب السنين ..ولما بقت عيد للنصر ..هانت حاجات كتير..
لما كبرت واتجوزت وكان ليا ابن كبير ..بيمشي في احتفالات اليوم ده..وأحكي له ايه اللي حصل فيه..وان جده وجدته..كانوا شهداء فيه..وتروح تزورهم في مقابر الشهداء ..والأرض اللي اندفنوا فيها في شارع بيتنا..قبل ماينقلوهم للمقابر ..خير شاهد على العدو الغادر..اللي كان فاكر هنسيب أرضنا له..لكن كان درس له ..وبفتخر النهاردة اني بنت شهيد وشهيدة ..وجدتي كان شهيدة..





إلى لقاء مع جزء جديد بإذن الله..






http://up.3ros.net/get-5-2011-4cqi7wzx.gif

نصيرة تختوخ 27 / 05 / 2011 06 : 12 PM
رد: حكاية مش للكل معروفة ..
 
اقتباس:
المشاركة الأصلية كتبت بواسطة منى كبارة (المشاركة 118910)


http://up.3ros.net/get-5-2011-vm7iyk43.JPG


مساء الأنوار..
وفي نفس الميعاد ..كان لينا لقاء
لنتابع معاً الجزء الثالث
ومع وش الخير ..عم عثمان النوبي
نبدأ حكايتنا الجديدة ..


http://up.3ros.net/get-5-2011-ay3uuax0.gif




خط سير ..وفاعل خير

...................



عم عثمان..راجل نوبي مولود في بورسعيد..وساكن في شارع أسوان ..وفي الأربعينات ..كان له خط سير يومي ..يخرج من بيته الصبح ويقول..ارزقني برزق يومي..ومشوار الصبح في الصيف ..وفي الشتا واحد..يروح جنب المينا..وعلى صدره صندوقه الخشب ..المتعلق في رقبته..وعليه أنتيكات وعقود..ويدعي إن المركب الإنجليزى تعود..ويستنى بحارتها على باب عشره ..أغلبهم يعرفوه ..ودى عِشرة ..




http://up.3ros.net/get-5-2011-mwiwskwu.jpg



ويطلع بعد كده على البيت الحديد.. إللي كان في شارع الجمهورية ..والكازينو إللي فيه يسهر للصبحية ..حركة بحارة وتجارة ..ويبيع وربنا يرزقه ..وبعد كده يخش على محل جيانولا إللي قباله..وهنية له لما يقابل الخواجة يني اليوناني..يرزق منه ..وبعد كده أرمنيوس الأرمانلي ..أصل بورسعيد كانت مليانة بالأجانب ..زى بر مصر في الوقت ده من الزمان..والكل يديله الأمان.


وبالليل يطلع على فندق وكازينو بالاس ..معاه الفل والياسمين ..والموسيقى والرقص اليوناني..ويبقى فيه خليط جميل من الروايح ..وانت واقف على رصيف سيبس..تلاقيه فايح.


وفي الصيف ..يطلع الصبح على البحر ومعاه الفل والياسمين ..يلف على كابا نون الغزل ..إللي كان زمان على البحر ..وبعد كده يطلع على كازينو الجزيرة في رحلته اليومية ..والرزق يحب الخفية ..وأجمل ذكريات.


وخط سيره ده استمر من الأربعينات لحد نهاية الخمسينات ..لما وصل من العمر للستينات..وكان سمار بشرته وظرفه ..حبب الناس فيه وفي هيئته..لحد رجله ماخانته ..وإتزحلق من على الرصيف ودماغه خبطت فيه..وأغمي عليه..ولما فاق لقى نفسه مابيشوفش ..حصل انفصال شبكي وإتهدد بالعمى .. والراجل رزقه يوم بيوم..ولو بطل يوم..العيال في البيت بالكوم.



وإبتدى خط السير من جديد ..ويرافقه فيه ابنه وجيد..وكل مايمر على الناس إللى تعرفه ..تشترى كل إللي معاه..صعبان عليهم ياولداه..بس لما حد يديله عطية لله..كان يبتسم وسنانه البيضا تبان..ويديهم مكانها اللبان..أصل نفسه عزيزة عليه.


وفي رحلة الصيف ..عند البحر..لما كان بيمر بين الكباين الخشب الأبّهة إللي اتحرقت أغلبها في ستة وخمسين..شافه الراجل الطيب..إللي كان من الناس المعروفين يعطي لله..واسمه مايبقاش من المذكورين ..حسنته خفيّه..وعيشته هنيّه..ولما إفتكره نادى عليه ..وخد منه كل الياسمين..وقاله انت من معالم بلدنا..ومن الناس الطيبين..وعليّا لك دين..انت فاكر لما خدت منك الياسمين من سنين ..كان عقد جميل ووشه علينا زين..لما خدت توكيل مركب ومدتها بالتموين..وفتحها عليا ربنا من وسع.. وإتفائلت بيك وبالياسمين..إنت فين ياراجل من سنين ..وطبعاً عم عثمان مش فاكر..ياما باع لناس كتير ..بس لما سمع إسم الراجل الطيب ..عرف أصله الطيب ..ده من أهل البلد المخضرمين..وحلف الراجل ميت يمين..وبإذن الله يرجعله نور العين..وإتعهد بعمل عملية له ..عند أحسن الأطباء في مصر ..بس طلب منه إنه مايذكرش إسمه..ويفضل إنه يكون فاعل خير..وربنا يكتر من أهل الخير فيكي يابورسعيد..


وإنكتب لنظره عهد جديد..يشوف بيه كل الأماكن الجميلة ..إللي كان بيشوفها في خط سيره..
وضاف لسيره رصيف سيبس..وندر يدي للأحبة والخُطّاب ..الفل والياسمين من غير مقابل ..
لأن إللي قابل فله وياسمينه بالخير ..حببه في فعل الخير..




مع خالص تحياتي..



http://up.3ros.net/get-5-2011-4cqi7wzx.gif


حكاية بسيطة و جميلة كالياسمين.شكرا منى
:nic58:

Arouba Shankan 27 / 05 / 2011 16 : 12 PM
رد: حكاية مش للكل معروفة ..
 
[align=center][table1="width:95%;background-color:orange;border:2px double purple;"][cell="filter:;"][align=center]منى كباره
الحب هو الحكاية الاسطورة التي لا نصدق أن نصادفها واقعيا
الفكرة حلوة ،،سأعود للقراءة[/align][/cell][/table1][/align]

منى كبارة 28 / 05 / 2011 26 : 12 AM
رد: حكاية مش للكل معروفة ..
 


عزيزتي
Arouba
نورتي الموضوع بمرورك الكريم
في انتظار تشريفك مرة أخرى ..

مع خالص تحياتي..


http://up.3ros.net/get-5-2011-l3o32itg.gif

منى كبارة 28 / 05 / 2011 18 : 02 AM
رد: حكاية مش للكل معروفة ..
 


أهلا ..يادكتور..في بلدك

..................

http://up.3ros.net/get-5-2011-ay3uuax0.gif


حكاية سمعتها..عن قمة التضحية والفدائية ....
عن أستاذ جامعي..جاى لبورسعيد من القاهرة ..في بداية الخمسينات ..لما الإنجليز كانوا على نفسنا كابسين ..ولمداخل بورسعيد محوّطين..

وإللي حكالي ..مايعرفش اسم الدكتور..عشان راجل سنه كبير..والذاكرة ماتسعفوش..لكن قال إنه حاول يدخل بورسعيد..وكان نفسنا نقابله ونقوله..أهلاً يادكتور..

والعسكرى الإنجليزى منعه..ونفسيته اتأثرت..إزاى مايقدرش يدخل بلد هي جزء من بلده..ومشواره ماحدش يعرف بالظبط جاى ليه.. ولا وجهته إيه..وقاللي إن فيه ناس قالوا..انه جاى استطلاع عشان عملية فدائية ..

لكن لما رجع لمصر..رجع تاني بعدها بإسبوع..وصمم يدخل..وطلب من العسكرى ..إنه يقابل رتبة كبيرة ..عشان معاهم يتفاهم..

وجاله ظابط صغير..لكنه صمم يقابل رتبة أكبر..ولما اتجمع أكتر من خمس قواد للمعسكر..طلع من جسمه مسدسين..وفرّغهم فيهم..وفي لحظة جت له دفعة طلقات من رشاش ..خلصت عليه.



ولما سمعت الحكاية دى جسمي قشعّر..أد إيه الناس كانت بتحب مصر ..وبتكره الإحتلال..عشان أستاذ جامعي ودكتور..يدفع حياته ثمن للقضاء على الإحتلال..




http://up.3ros.net/get-5-2011-2fwvyzig.jpg





ولما الخبر وصل لولاد الحلال ..رجال المقاومة الشعبية ..إللي بيتدربوا جنب ديليسبس..إلا وجن جنونهم..وسنوا سنانهم..وحضّروا خناجرهم..وراحوا على معسكر الإنجليز..وكلهم كره وغيظ..والمعسكر ده..في منطقة لسه موجودة ..واسمها الجولف ..لما خطفوا الكلب الوولف..إللي على سور المعسكر..وكل واحد منهم عسكر جنب السور..وقعد يلف ويدور..

ولما عرف إنهم في احتفال وسكرانين..دخلوا المعسكر على دفعتين ..وخدوا بتار الدكتور..لما السكينة تلف على رقبتهم وتدور والواحد منهم يصرخ زى الطور..وعليهم نور..

وقدام المقاومة في كل مكان..هجروا المكان..وكان الجلاء ..والناس حست بسرور وهناء ..






إلى لقاء مع جزء جديد بإذن الله..





http://up.3ros.net/get-5-2011-4cqi7wzx.gif

منى كبارة 01 / 06 / 2011 44 : 05 AM
رد: حكاية مش للكل معروفة ..
 



العائدون من هامش التاريخ

......................


http://up.3ros.net/get-5-2011-ay3uuax0.gif


السيد هريدى ..مدرس تاريخ..حافظ للتواريخ..وأسرته أصلها صعيدى ..ولما جه الجد الكبير هريدى ..للفرما..عشان يبقى من حُفار القنال ..قعد في خيمة العمال..في المنطقة اللي جنب ميناء الصيد في الوقت الحالي..

ولما التاريخ ذكر في هوامشه..إن عمال القنال كانوا حوالي ..ألف وأكتر في بداية الحفر..وكان جده الكبير فيهم..ودايماً جده لأبوه يحكي له..لما جه مع أبوه وأمه..وهو لسه صغير..وأبوه كان وشه مدوّر..وفيه عافية بعشر رجاله..ومحاله حد يغلبه في لعبة الريست والتحطيب..وقاله جده انه مات في الحفر في المنطقة اللي قدام ديليسبس..واسمها دلوقتي حوض الجونة..وكانوا بيقولوا عليها حوض الشونه..



وفي بداية الخمسينات ..راح السيد وقعد على حجر قاعدة رصيف سيبس..وقعد يبص للميه..ويقول لولا رجالتك الصعايده يامصر..اللي كانوا بيشتغلوا من الفجر لحد العصر..ماكان لمجرى ميتك وجود..ولا كان لتمثال ديليسبس قاعدة متينة على عمود..ولا التاريخ ذكر اسمك..انت وبلدك ..والخديوى سعيد..والملكة أُجيني..



لكن اللي تعبوا ..ولحياتهم وهبوا..مذكورين في التاريخ في هوامشه مجرد أعداد..وجدى منهم رقم في مجموع الأعداد..آه ياجدى لو أشوفك وتحكيلي ..وأمشي معاك وأفخر بيك في التلاتيني..ومحمد علي..
وأبيّن للناس شأنك العالي ..آه ياجدى.



ومع تكرار الزيارات ..بقى المكان للسيد..وكأنه من المقامات..ومع تكرار النداءات ..ظهر له الجد..ومعاه عشرة من الأصحاب..هدومهم فيها رمل وعرق..لكن له عطر جميل..وايديهم مشققة ومشددة..من مسكة الفاس..ومسك نازل منها ونعم الناس..

ولما شافه الجد ..قاله تعالى ياسيد ياهريدى..ياابن حفيدى..وقاله السيد وحشتني ياجدى..مع إني ماشفتكش..الوقت مر كتير..لكن مانسيتكش..والجد عرّفه على صحابه..اللي ماتوا معاه في حفر القنال..ده اسماعيل..من اسماعيلية..وده عوض من الشرقية..وده مرسال من المطرية ..وده حنا وده اسكندر..من الصعيد بلدياتنا..وكلهم بصوا على بورسعيد..بأنوارها..وبصوا للقنال والسفن بأضوائها..وقالوا..بقيتي عمار..يافرما..وتعبنا ماراحش بلاش..



قالهم السيد..دلوقتي بقى اسمها بورسعيد..قالوا الله يسامحه الخديوى سعيد..وبصوا لديليسبس..ولما عرفوا ان مهندس القنال..شبطوا في خناقة..وكأنهم هيوقّعوه ..ولعنوا أبوه..وأنا أقول لهم..انسوا واغفروا..مادام عرقكم ودمكم جري في الشريان..اللي بقى للحياة..ولبلدنا كيان..ضحكوا وقالوا..عشان خاطرك ..هنسامح كل اللي أساء في حقنا..من أول الخدويوى سعيد..لحد العسكرى العثمانلي..وديد..اللي كان كُرباجه على ضهرنا حامي..



وأصل بلدنا ياحفيد بلدياتنا..بتقاسي كتير..وولادها مابيبخلوش عليها..حتى لو كانت بالسخره..بس رب القدره بيحميها..واحنا فرحانين إن خيرها رجع ليها..



وبص واحد منهم..لقى العسكرى الانجليزى بيتجول على الرصيف..خاف وقال..انتم لسه في بلدنا موجودين..ياللا يا بلدياتنا نرجع لسكناتنا..تحت رمل القنال..
ومشوا واختفوا..والجد معاهم..والدموع فرت من عين السيد هريدى ..وقال لو كان بإيدى ..لدفنت العسكرى الإنجليزى ..مطرحهم وطلعتهم تاني..



ومع الصبر والأماني ..وبعد سنتين ..خرجوا من بلادنا..ورجع السيد ينادى من تاني..
اظهر ياجدى انت وصحابك..العدو خلاص..سابنا وسابك..اظهر انت وصحابك..عشان ألف معاكم كل بورسعيد..وأعمل لكم احتفال كبير..يليق بيكم..ووسام على صدوركم نحطه..



والتاريخ ماحدش هيقدر..يغيّره ولا يحرقه ولا يمطه..ولا يشيله ولا يحطه..وإذا كان التاريخ ذكركم أرقام في الهامش..إنتم اللي بقيتم أبطاله..
واللي أتذكروا بقوا على الهامش..
ويجيله صوت الجد والأصحاب..ويقول له..
احنا دلوقتي حسينا..إن دمنا ماراحش هدّر..عشان القنال ..ميتها ورملها وحدودها وأرضها..وخيرها وطرحها..
بقى ملك لأحفادنا..وأحفاد أحفادنا..




إلى لقاء آخر
مع جزء جديد بإذن الله..




http://up.3ros.net/get-5-2011-4cqi7wzx.gif


الساعة الآن 53 : 07 PM

Powered by vBulletin® Copyright ©2000 - 2025, Jelsoft Enterprises Ltd.
Tranz By Almuhajir *:*:* تطوير ضيف المهاجر

الآراء المنشورة لا تعبر بالضرورة عن رأي الإدارة وتمثل رأي كاتبها فقط
جميع حقوق النشر والتوزيع محفوظة لمؤسسة نور الأدب والأديبة هدى نورالدين الخطيب © ®
لا يجوز نشر أو نسخ أي من المواد الواردة في الموقع دون إذن من الأديبة هدى الخطيب
مؤسسة نور الأدب مؤسسة دولية غير ربحية مرخصة وفقاً لقوانين المؤسسات الدولية غير الربحية