نفسي اسأل شوية أسئلة بس خايف يعملولي مشكلة
وانا على قد حالي لا ليا ضهر ولا ساكن في برج عالي
ولا عندي فيلا في مارينا ولا شالية في الساحل الشمالي
اهم حاجة عندي بلدي وعيالي
كل اما آجي اتكلم يقولولي خليك في جنب
هو انت اللي هاتغير الكون والا انت اللي ها تزيح السد
وانا باقولهم يا جماعة البلد دي مش فرد
البلد ديه شعب وناس وأرض
ودنيا تانية اسمها الوطن
الاسم ده اتشال من القاموس
الاسم ده سبب الكابوس
يعني ايه وطن ويعني ايه بلد كل همها انها تدوس على الشعب المنحوس
وكل اما تيجي تتكلم وتكح جنب يعملولك قضية وتبقي عميل امريكاني قد الدنيا
وتبقى بسلامتك جاسوس
ولسه عايزني اسأل أسئلة
وساعتها هابقي لوحدي ومش هاتبقى مرجلة
وما تعرفوش اذا كنت هاتعلق في سلسلة
والا هايقولولي دا كان وكان ودي كانت مرحلة
والله لسة واقفة في زوري الأسئلة
الله لو أروح فابو نكلة لسألها وربنا ياخدني والا يباركلي مش مشكلة
نفسى أسال
هو مشية على الارض مش مسموح
وليه الكل بيبقى مطاطى فى الارض
وكأنة عامل ذنب
أمال فين الشجاعة ولا الشجاعة بس علينا
البلد دى بتاعة مين ولا كلنا بتوع فرد
يعنى ايه ديمقرطية مش هي هي
بالظبط زى الكستر والمهلبية وانا اختصرت الكلام
ياالله حسن الختام وربنا يهون عليك وعليَّ
اصل أنا لحد دلوقت مش عارف الفرق بين الاستعمار والحرية