|
تعظيم سلام
تعظيم ســــــلام أنا مين أنا في وسط كون أنا إيش أكون كائن بسيط جوَّه المُحيط مليان شجون مليان قلق شايل هموم من قبل حتى ماينخـَلـَق بدَأ الحياه في حُضن كوم واما ابتدا ف المشىْ تاه شامِم سموم نايم جعان طول عمره خايف م الحيتان اللي بتاكل كل يوم ناس م البشر ملايين ألـُوف حواليها واقفه دياب كتير وكلاب من الحجم الكبير تِستنى لما تِنتِهي كل الحيتان من أكلها واقفه تزوم لاكن بخوف وف أى فرصه تلوُحْلها تهجم على الشعب اللي كان دايمًا جعان تِنهش في باقي لحمِته بكل امتهان وانا وسطهم لا شيء .. ناموسه مااحتمِلشي أى دوسه وأى عضـَّه م السِنان أنا كل ما أملك لسان بس انخـَرَس علشان جبان أنا إيه أنا في وسط كون أنا مين أنا وسط النجوم وسط الفضا بين السكون أنا إيش أكون وسْط المجرات ف السما إنسان بسيط .. مخنوق لو جيت أبُّص ف يوم لفوق علشان أشوف طلعة شروق علشان أعيش إنسان واسوق مركب حياتي المتعبه ألقى السجون مزروعه ميت مليون خازوق في الإنتظار الناس هناك جوه اللومان لو حد فيهم يستجار لازم يدوق طعم الهوان .. والإمتهان لازم يطاطي ينضـَرَب فوق القفا واللي يعارض ينسحب خلف البيبان وتحوَّطـُه كل الحيطان وتضِيع حياتـُه ف الخـَفا ـــــــــــــــــــ أنا مين أنا وسْط السجون حشره .. ذبابه في أي لحظه بالمبيد أصبح عدم أنا إيه أنا وسط العِباد أنا شيء مُكرر .. شيء مُعاد واحد وماشي مع البشر لكن جماد دايمًا في آله بينعِصر عايش كميِّت في البلاد ماشي وحيد رغم الزحام وحياته غرقانه ف ظلام أما المكان العتمه فيه طاغيه على ضوء النهار ويُفـَط كتار مكتوبه فوق كل الديار وعلى الحيطان والأعمِده وسْط الطريق مكتوبه بالخط العريض بكتابه واضحه منوَّره فيها البريق ( ممنوع تجاهِر بالكلام والإبتسام حتى النفس ولا حتى تتمنى الحياه كل اللي مسموح تِترفِع إيدك بتعظيم السلام ) |
رد: تعظيم سلام
الأستاذ الزجال القدير مسعد النحلة : زجل جميل ، يدل على إمتلاكك موهبة الشعر الزجلي البديع .. و الهدف و الفكر واضح و محدد . أعجبني الفن الزجلي و العرض النصي الصريح الواضح .. ولكن لم يعجبني ( شخصياً ) النغمة الانهزامية السوداء السلبية .. لماذا لا يكون الأمل في التطور و الاصلاح هى النغمة السائدة و المؤثرة .. كفانا بكاء على اللبن المسكوب .. علينا مسئولية وواجب - نحن الكُتاب و الأدباء - تجاه الجيل القادم الصاعد .. هذا الواجب هو رسم و تخطيط طريق الصلاح و الاصلاح .. و الذي لن يحدث إلا من داخلنا ومن إيجابية أنفسنا . مع الإيجابية في الفعل و الكلام ، سيتحقق المُحال .. تعظيم سلام . تحياتي و تقديري . د. ناصر شافعي |
رد: تعظيم سلام
اقتباس:
ولكن يبدو أن الشاعر لا يستطيع الفكاك من حالته النفسية وقت الكتابة والإبداع .. والحمد لله أن الحالة النفسية لا تستقر على حال واحد فهي تارة في يأس وألم وتارة أخري في أمل وفرح .. شكرا جزيلا لك هذا التفاعل والتفاؤل الجميل وتقبل تحيتي واحترامي :nic54: |
| الساعة الآن 49 : 08 PM |
Powered by vBulletin® Copyright ©2000 - 2025, Jelsoft Enterprises Ltd.
Tranz By Almuhajir *:*:* تطوير ضيف المهاجر
الآراء المنشورة لا تعبر بالضرورة عن رأي الإدارة وتمثل رأي كاتبها فقط
جميع حقوق النشر والتوزيع محفوظة لمؤسسة نور الأدب والأديبة هدى نورالدين الخطيب © ®
لا يجوز نشر أو نسخ أي من المواد الواردة في الموقع دون إذن من الأديبة هدى الخطيب
مؤسسة نور الأدب مؤسسة دولية غير ربحية مرخصة وفقاً لقوانين المؤسسات الدولية غير الربحية