أم لبنات ولعزارة
 

يا الصبارة
أم لبنات ولعزارة
مقابلة البيت وكنت ليه اعمارة
واخدة لينا حقنا من الحكارة
ما تجي علينا اضسارة
امسايرة ليام الدوارة
امواجهة المصايب القهارة
قاهرة لرياح الغدارة
كبدتك بالمحبة فوارة
قلبك ف دواخلو نوارة
بعطرها ترشي
على لكبير والصغير بسخاوة
تكمديها ف قلبك
ما تعرفي اعداوة
اتضحكي ف وجه لعدو ولحبيب
وتعملي بحساب الدم والخاوة
جامعة الشمل
حاملة الثقل
صبرك ما يكل ولا يمل
الدمعة ف عينيك الطل
تحبسيها وتبتسمي للكل
ما تمدي يدك ما تقولي آرا
قانعا بالقليل وامدبرا
ما اتنهدي ولا تقولي يا حسرة
فنيت عمري وكنت ف يوم زهرة
كل أم نركع تحت اقدامها
وانقبل ارجيلات
نطلب منها السماحة
ونبوس لعوينات
والميتة منهم نطلب ليها الرحمات.