|
مساجلة ،زجلية،
المتهم البريء
بريء تهموه بحبال طويلة كتفوه شاهد الزور سمعوه حكموه متهوم سلموه ف الحبس سجنوه يا ناس ظلموه حريتو سلبوه ف حياتو عقدوه يتبع... |
رد: مساجلة ،زجلية،
قْدامْ القاضي وَقْفوه مَذْهولِ ما عْرَفْ ما يْقولْ كْثَرْ اللْغَى واللْغيطْ مَنْ حَرْ الصَدْمة مْغَيَّبْ ما قْدَرْ يٍفيقْ سَأْلوهْ.. سْأَلْهُمْ بْغٍيتْ نَعْرَفْ عْلاشْ مَنْ فْراشي جَرّوني ضَرْبوني واتَّهْموني و شَبْعوني تْسَرْفيقْ الجاني سَلَّكْها فْلوسْ كَبْشْ الَفْداَ عَلْقوني بْسْكاكَنْ ماضْيَة سَلْخوني يا لْعالي شوفْ مَنْ حالي وْحالْ لَمٍيمَة تَبْكي وْ تْشالي راهْ وْليدي مَرْضِي وُ ما فيه عَيْبْ الصَيادْ نٍيْتُه عَوْجَة طَيَّحْ وْليدي فْ مْصيدَة ضْرَبْنا بْجوجْ بْجْويجَة شرح الكلمات اللْغَى: اللغو واللْغيطْ: اللغط بْغٍيتْ نَعْرَف: أريد أن أعرف عْلاشْ: لماذا جَرّوني: سحبوني و شَبْعوني تْسَرْفيقْ: أشبعوني ضربا على الوجه سَلَّكْها فْلوسْ: تنصل من الجريمة بالرشوة الَفْداَ: الفداء بْسْكاكَنْ ماضْيَة: سكاكين حادة تْشالي: تلوح بيديها عَوْجَة: غير صادقة طَيَّحْ وْليدي: أطاح بابني بْجوجْ : نحن الإثنين بْجْويجَة: ببندقية |
رد: مساجلة ،زجلية،
المسكين يبقى ف القلب
ورا القضبان بات معذب التهمة ليه كانت مقصودة ف سوايع معدودة نزلو الباطل عليه الشهود كاع هربو عليه قلوبهم حجر واخا شافو ميمتو ف الأرض من حر الفقصة ممدودة زمان واش من زمان الثقة عادت فيه مفقودة |
رد: مساجلة ،زجلية،
زيدو وعطيه طاق طاق طرطلاق صاق صاق صرملاق كيفاش أنت في الشبكة وعينيك محنززين..؟! كيفاش .. أنا راني راجل درويش!! وما قاد على تكرفيس يدي مقهورة وعيني محدورة ولي وقع لي بسباب .. قلة الشي ونفسي طْمّاعة كلت مع راسي .. آش فيها إلاَ خرجت مع جْماعة وطالبت "بشي شوية الزيادة" ..!! -أتمنى ألا تكون مساهمتي ... قد انعطفت منعطفا ... يجر إلى القفص الحقيقي - ( ابتسامة ) |
رد: مساجلة ،زجلية،
التهمة أنا بعيد اعليها دافعت على نفسي ما سمعوني كحالت الدنيا ف عيوني دوقوني كل انواع لعذاب قالوا بغاوني انكر= أعترف وباللي مخبي السر وانا عشت احياتي انسان حر غادي ف طريقي راسي عريان ما كاين ما يتخبى قلبوا لي على السبة دخلوني للسلة الله ياخد فيهم الحق نزلوا اعليا الباطل خلاوني ف دوامة حاصل لبسوني لباس الحبس حلقوا لي شعري اعطاوني نمرة لصقوها على ظهري حسبت ليام والشهور اللي اطوالت لصحاب ليا انسات وغابت احلامي اللي ابنيت اتهدمت و رابت نفسيتي قتلوها ماتت كرامتي اتهانت السوايع اتقالت رحمة الله ترجيتهاف كل الأوقات تبان براءتي ونعيش الحياة. |
رد: مساجلة ،زجلية،
مابين الحق والباطل ربع صباع.. الحق، مات وشْبعْ مُوتْ.. الباطل، وَلدْ وشبعْ خُوتْ.. الحق، مات عزري.. شهود الباطل، كفنوه ملي كان دري.. عزاوني فيه .. بكاوني فيه.. المصيبة... حضرو أهل السماع... |
رد: مساجلة ،زجلية،
تلمو لمة الجماعة سيرْتي ف الكاعة دْرَّاوْها طَحْنوها كلامهم دقيق صافي خَرْجوني نخالة كثر القيل والقال هو اللي جابها لراسو آشْ الدَّاه يدير يَدو فْ لَعْصيدة |
رد: مساجلة ،زجلية،
قالوا ايديه ف لعصيدة
ألفو عليه قصيدة آش قالوا زين مو خان ولد عمو ناس الدوار بغاوها فيه شافوا الظلم و سكتوا عليه كتموا الشهادة من يد الظالم واخذين اللعاقة خسارة الدرويش منعوه من العيش ف الكاشو لاحوه يتصنت لبرودة الضس و قلة القس شرح الكلمات: اللعاقة : التدويرة يعني النقوذ لكتم الشهادة الكاشو : السجن يتصنت لبرودة الضس يعني استسلم لبرودة الأرض القس : الأكل |
رد: مساجلة ،زجلية،
يتصنت لبرودة الضس وقلة القس عقلو شارد قلبو بارد لمن يحكي قصتو المبهومة وسط حيوط مشؤومة شاهدة على حكايات ناس مظلومة وهو ف الحبس اسمع اخبار موت الميمة اللي ماتت بالحسرة اجمع مسكين الوقفة ضارت بيه الدنيا حس بالضوخة قال مع راسو واش أنا ف حلم ولا ف علم نزلت من عيونو ادموع اتكب ولدت امراتو ما شاف اعويناتو طالت ايام لفراق طلبت مراتو اطلاق |
رد: مساجلة ،زجلية،
فتيحة حاولي على المتهم راك جمعتي ليه حب وتبن (إبتسامة) |
| الساعة الآن 01 : 11 PM |
Powered by vBulletin® Copyright ©2000 - 2025, Jelsoft Enterprises Ltd.
Tranz By Almuhajir *:*:* تطوير ضيف المهاجر
الآراء المنشورة لا تعبر بالضرورة عن رأي الإدارة وتمثل رأي كاتبها فقط
جميع حقوق النشر والتوزيع محفوظة لمؤسسة نور الأدب والأديبة هدى نورالدين الخطيب © ®
لا يجوز نشر أو نسخ أي من المواد الواردة في الموقع دون إذن من الأديبة هدى الخطيب
مؤسسة نور الأدب مؤسسة دولية غير ربحية مرخصة وفقاً لقوانين المؤسسات الدولية غير الربحية