منتديات نور الأدب - الْوَقْتْ احْرارْ

الْوَقْتْ احْرارْ

قالُو ناسْ زْمانْ
الْحُرْ بَالْغَمْزَه وَالْعَبْدْ بَالدَّبْزَه
مَلِّي يْجِي الْخَطَرْ
وُيَصْدَرْ الأَمْرْ بْ لْزُومْ الدّارْ
لاَ تْقُولْ رِيْحْ دَايْزَه
هَادْ الْوَبَا مَنْ الشِّنْوا وْ اللاَّ مِرِيكانْ
مَا زالْ ما تْحَقَّقْ اخْبَارُ بَالْبَيانْ
الْهَايْجَه زارَتْ جْمِيعْ الْبُلْدانْ
دَخْلاَتْ بْلاَ ڤِيزَه
حَصْداتْ كْثِيرْ مَنْ رْواحْ الْبَشَرْ
وُمَنْ خُوفْ الْعَدْوَى تَمْنَعْ السَّفَرْ
وُحَاجَاتْ اُخْرَى تَدْفَعْ الضَّرَرْ
إوَا الْزَمْ دَارَكْ
آنْجَى مْعَ اوْلاَدَكْ وُجَارَكْ
وُبَالشْغُلْ قْضِي نْهَارَكْ
وُالاَّ تَصْبَحْ رَقْمْ فْ لاَئِحَةْ كُورونَا
تْلُومْ رَاسَكْ وُتْقُولْ رَاهْ نَصْحُونَا
الْوَقْتْ احْرارْ وَالْمَرْضْ هَوَّلْنَا
إِوا فِيقْ أَخُونَا
الْحَجْرْ الصِحِّي وَسيلَه وِقائِيَّه
حَلْ بِهْ نْحَارْبُو الْحَالَه الْفُجائِيَه
اللِّي وَحْداتْ الْعالَمْ بْنَفْسْ التَّدْبِيرْ
قْلاَّتْ حِيلْتُو وُ فَكَّرْ آشْ يْدِيرْ
أَوَّلْ خَطْوَه اتَّخَدْ الْقَرارْ
كُلْشِي يَلْزَمْ الدّارْ
عَلْنُو الْوِقايَه بَالْإِنْدارْ
وْلْغافَلْ عَمَّرْ السْبيطَارْ
سَاقْ اهْلُو وُ زَادْ الْجَارْ
وُ مَنْ في طْريقُه داقْ النارْ
راهَا جَايْحَة دَبَّرْهَا الْبَشَرْ
صْنَعْهَا لَعْدُو فِي مُخْتَبَرْ
إِوَا اتَّقُوهَا بَالْحَدَرْ
بَلاَءْ بِهْ الدَّنْيَا تَطْلاَتْ
يَاكُلْ الْحَلْقُومْ وَالرِّئَاتْ
رَاهْ يْعَادِي وُ يَقْتَلْ
سَعْداتْ اللِّي مَنُّه تْنَصَّلْ
نَشْراتُه قْلُوبْ الْكَراهِيَّة
هُوَ حَرْبْ ڤَيْروسِيَّة
ارْخَصْ مَنْ الدَّبَابَه وُالْمَدْفَعِيَّه
شِي كيَقْوُلْ بَانْ اخْبَارُه مَنْ زْمانْ
وًشِي كَيْقُولْ جْديدْ وُلْدْ الآوانْ
وُشِي كَيْقُولْ هْجَمْ مَنْ وُوهَانْ
الْمُهِمْ هُوَ وَلِيدْ الْعُدْوانْ
قَالْ لِيكْ قُوَّه وَحْدَه تَحْكَمْ الْعَالَمْ
بْغَاوْ يَخَلْقُو حُقْنَة إِبادَه
يْصَفِيوْ الدَّنْيا وُ يْزيلُو لَحْدادَه
بْغاوْ يْخَلْقُوا حَرْبْ ثَالْثَه
كْبيرَه أَسْلِحْتْهَا نْفَاتَه
بْغاوْ يْدِيرُوا الْعَالَمْ فْ قَبْضَه وَحْدَه
بْغَاوْ يْزَيْرُوهْ وُ يْحَكْمُّو الشّْدَّه
وُانْسَاوْ الْحَاكَمْ لَكْبِيرْ
اللِّي فْ مَلْكُو قَادْ يِدِيرْ
سْفَاهَا عْلَى عْلاَهَا
وُ السْفِينَه تُّوهْ عْلَى مَجْرَاهَا
وُ الْكُلّْ يَصْبَحْ فْ خَبَرْ كَانْ
بْحَالْ إِلَى شِي مَا كَانْ
خْلَقْ الدَّنْيَا وُ قَدَرْهَا تْزُولْ
وُ الَعْدُو عْلَى الدّْوَامْ مْعَوَّلْ
نْسَأْلَكْ يَا الْعَالي الْقَديرْ
تَلْطَفْ بِمَا جْرَاتْ بِهْ الْمَقاديرْ
تَرْفَعْ عْلِينَا الدَّاءْ وُالْبَلاَءْ
وُ تَنَجِي عْبادَكْ مَنْ كُلْ وَبَاءْ

-------------
1 - الْحُرْ بَالْغَمْزَه وَالْعَبْدْ بَالدَّبْزَه: مثل سائر يقصد به؛ أن النبيه يفهم بالكلام والجاهل الغافل يفهم بالعصا
2- مَلِّي يْجِي: لما يأتي
3- لْزُومْ الدّارْ: المكوث في البيت
4- دَايْزَه: عابرة
5- الشِّنْوا: الصين
6 - مِرِيكانْ: أمريكا
7- بَالْبَيانْ: بالواضح
8 - الهايْجَه: مصيبة الكورونا
9- ڤِيزَه: تأشيرة السفر
10- احْرارْ: أصبح صعبا؛ عصيبا
11- هَوَّلْنَا: من الهول و الهلع؛ أفزعنا
12- آشْ يْدِيرْ: ماذا يفعل
13- كُلْشِي: الكل
14- عَلْنُو: أعلنوا
15- عَمَّرْ: ملأ
16- السْبيطَارْ: المستشفى
17- راهَا: إنها
18- الجائحة هي الحرب والمقصود المصيبة
19- تَطْلاَتْ: امتلأت
20- سَعْداتْ: سعد وهنئ
21- اللِّي مَنُّه تْنَصَّلْ: من نجا منه
22- بْغَاوْ: أرادوا
23- لَحْدادَه: الحدود
24- يْزَيْرُوهْ: يحكمون ويثبتون وثاقه
25- سْفَاهَا: أسفلها
26- تُّوهْ: تتيه