منتديات نور الأدب - موعظــــــــــــــــــــة

منتديات نور الأدب (https://www.nooreladab.com/index.php)

- فضاءات الزاجل والنبطي والشعبي (https://www.nooreladab.com/forumdisplay.php?f=56)

- - موعظــــــــــــــــــــة (https://www.nooreladab.com/showthread.php?t=34052)

موعظــــــــــــــــــــة

موعظة
(شعر شعبي عراقي)
--------------

بقلمي : جعفر ملا عبد المندلاوي

عجيبة الدنيا من تضحكلك وتغريك = واتشبعك آماني وتخدعك بيها
تفرشلك فرح وتضملك الوجعات = سراب تشوف عينك ماي تجريها
تجيك بيوم تفرح وهي بس أوهام = والعاقل يفرزن ما يصد ليها
تخدعنه بغرور وتسـتر المضموم == وتجينه بــهادم اللذات تالــيها
أخبار الامم تحچيلك التفصيل == صـــاروا خبر كـان بأمـر فانيها
يبن آدم توعّى هم يجيك الدور = = وتجيك السكرة باللّي چنت ناسيها
ودنياك الّي تتعب بيها ليل نهار == لا تنسى القيامة بيوم يطويها
وإعمل للحساب إتذكر الأهوال =هاي السفرة صعبة بجهد تســـريها
وتيقن جاك ملك الموت وعد الله == ويبدي بقبض روحك بامر باريها
ما يقبل شفاعة ولا الك تأجيل = من تيبس الورقة الشجرة تذريها
يالغافل تنبّه وخلي زادك خير = ظلمه الگبر شوف اشلون تضويها
بعقلك لا بعينك انظر الدنياك == عقلك واعي يفهم كل مساعيها
واسمع بالگلب حتى الإذن خوّان == مو كلما تجيك احچايه تدنيها
وعاشر كل وفّي يصدگ وعد وياك = وباقي الناس احذر من تحاچيها
كل قول وفعل بكتابك مسجليه = وأبواب الظلم إبعدها إقصيها
وادخل عالم الارواح بالاعمال = = واصلح برزخك بالتقوى إمليها
هذا الموت مثل الهوا يمشي وياك = حتى أنفاسك من اتنام يحصيها
ما يتقدم ويتأخر شما چــان = = = كل شي بقَدَر يمشــي وهو جاريها
بعد المن تكابر مو شفت قارون = خسف بيه الارض سافلها عاليها
منكر لو نكير اهناك يتلگاك = = = = واشعندك إجابة اليوم اوعيها
من بعد الصلاة وصوم والأحكام = سنين العمر گلي اشلون گاضيها
هنيئا لليجاوب وبفصيح السان = وينطق بالشهادة اهناك يحچيها