شوف المسلم
 

ابكي يا عيني و غردي
راه الدنيا مهمومة
اشكي يا نفسي و فردي
لبيات المنغومة
شوف الدنيا تمشي بللور
و ناس فالباطل متهومة
شوف الظالم يغصب و يجور
من شرو القلوب مكلومة
شوف العربي ديما محقور
قدرو باخس ما عندو سومة
شوف المسلم دمو مهدور
رايتو منكسة و خيامو مهدومة
شوف العالم عامر بشرور
شوف العراق و فلسطين المظلومة
شوف الجاهل ينطح كي التور
و العارفين في حفرة مردومة
شوف الظلام يحارب فالنور
يعبد في الطريق الملغومة
شوف المسكين لاهث مضرور
يومو قاسي و احلامو محرومة
يشقى يتعب يجري و يدور
بين دوك لقوام المنعومة
يحلفو يمين يشهدو زور
يواعدوه بديمقراطية مزعومة
شوف الفقير سوقو مهجور
و مول الدينار الناس ليه رامو
شوف الحق جالس محقور
مهموم خايناه يامو
شوف الباطل يمشي مغرور
فرحان يشالي بكمامو
شوف الصدق ضامي مقهور
ناكد غارق في تخمامو
شوف المنكر عالي منصور
زاهي يتخنتر في سلهامو


حسن الحاجبي