منتديات نور الأدب

ركبت من مكان بعيد
و بانت لي غابة
ناس في هم شديد
و ناس قاهرة غلابة
ناس تشقى و تزيد
و ناس بشواقرها حطابة
...ما تكون هادي غير بلادي ...
حققت نشوف فالسما دخان
طار و علا
دار سحابة
فالبحر مواج تقذف شبان
تاهو ضاعو
وسط ضبابة
فالبر لحود و توابث و كفان
و دموع سايحة
و نسا ندابة
...ما تكون هادي غير بلادي...
شفت المسكين غايس واحل
و ذياب الليل
دايرة عصابة
شفت القاري مهمش عاطل
و الجاهلين
للكراسى مصطابة
و الحق علا عليه الباطل
لابس سلهام
وجلابة
...ما تكون هادي غير بلادي...
في وجه بلادي حققت الشوف
صورتو باهتة
و ضحكتو كذابة
يعبر بكلام ينطق بحروف
يروي قصة
يحكي سرابة
همو باين لونو مخطوف
يصرف لقدار المكتابة
...ما تكون هادي غير بلادي...
بلادي يا عز البلدان
وردة و الشوك حايط بها
الجبال و لشجار و ويدان
شاهدة بللي نبغيها
ساكنة فالقلب و لكنان
روحي و نفسي نهدي ليها

حسن الحاجبي