[عبد الغني الراقي]

يا الْجافيني طال جْفـاك
فايْن الصّْفا وهْبُوب وْفاك
مُسْتحيل تغدر وتْخـون
و تنْسى العشّْ اللِّي دفَّاك
-----
كنتي لي وافي لعْبـــار
صافي مْرايا من بْــلاَّر
كنتي قنديلي ف الـدار
وْياقْنِيديلي آش طْفـاك
مُستحيل تغدر وتخـون
وتْنْسى العشّْ اللِّي دْفَّاك
----
لجفا تْوغّل ف مْدُونـي
وْ حْرق الواحة ف عْيوني
وتاهت امْواجو بْسْفُوني
و يا غِيَّاثي آش خْفـاك
مستحيل تـهجر وتخـون
وتنسى العش اللي دْفَّاك
-----
آجي بالطّبْع اللِّي فيــك
تْرْسا سْفوني ف مْراسيـك
ونشوف مْدُوني في عِينيك
و يتْلوّْن ليلي بْصْفــاك
مُستحيل تـهجر وتخــون
وتنسى العش اللِّي دفَّـاك
*****