[فتيحة الدرابي]

اسمع يا السامع واروى لحديث
هذا كلام من القلب طالع
ما غير مكتوب في الديوان والأنترنيت
واقع فيه اتحطيت
بيه لنفسي ولنفسك ما ارضيت
باش نعيش
حاولت نخدم بكتافي ما كديت
حطيت الشواهد كدامي واشحال ابكيت
على ليام اللي عليها فنيت
عمري ضاع ف اجري وما دريت
وجدت نفسي في الربعين
لا خدمة لا زوجة لا بيت
اعييت اعييت اعييت
حتى باب ما خليت
بدبلوماتي وشواهدي ما سويت
عوض ما نترقع التليت
كيف كان طموحي وكيف وليت
وليت كالس في عتبة البيت
محبوس ومهووس
حتى اصحابي اللي اوقف معايا اليوم غدا يسوس
حيت جيبي خاوي من لفلوس
كالوا لي دير راسك وسط الريوس يا هاد المنحوس
لكن أنا ماشي منحوس
ازماني اللي منكوس
ازمان الحرب والطوفان وقتل النفوس
ما كاين غير اعفط أو دوس
حتى الغرب اللي بيه اشحال اتغريت
صبحت عندو أزمة مالية
وعلى رغبتي في الهجرة اتخليت
كيف اندير
الهيه اتحطم فيه حلمي اللي بنيت
وفي ابلادي الصبر اتعديت
كولوا لي
واش انعمر بلاد الغرب اللي فيه تهانيت
من القمع والعنصرية عانيت
ولا نكلس ف بلادي
ويكفيني الخبز والزيت
لكن أنا قريت ووعيت
كون بقيت جاهل كوراني تعاميت
نخدم خماس وما نكول عييت
لكن أنا حلمي ليه شحال تسنيت
وما زال نتسنى وعليه نكافح
حتى انعيش كيف ابغيت.