[نجلاء سلامه]

ارحل يا حسني واترك ربوعك
كفيانا ذل موتنا جوعك
شفنا المرار تلاتين سنة
إرحم ولادنا .. غور من هنا
ولا انت بالحكم ورثتنا
ارحل بعيد ماتعود لنا
عاوزين طهارة لارضنا
ارحل يا حسني وخد متاعك
اللي اشتريته بدمنا
ماتفكر انه بتغيير حكومتك
راح تبقي واحد مننا
ارحل يا حسني كفياك دمار
ظلمك ده لينا حملنا عار
بينا وبينك أصبح ده طار
لازم نشيلك من هنا
ارحل يا حسني وإضوي شموعك
ولا لامريكا أصبح خضوعك
حتي فراقك أهون لنا
ارحل يا حسني كفاياك خنوع
مبقاش يفيدك حتي الرجوع
طلبت رحيلك كل الجموع
اصبح خروجك همنا
ارحل يا حسني وابعد سمومك
كام شب مصري مات من همومك
بعد اما هاجر أرضنا
ارحل يا حسني واحفظ كرامتك
ولا المزاج ادمن إهانتك
هرفع إيديا لربنا
يبعد شيطانك عننا
ده الشعر شاب من صغرنا
ما بقينا حاسبين عمرنا
ارحل يا حسني كفياك وعود
بالكدب تفضحك العهود
زمنك خلاص راح وانتهي
ارحل وسيبنا بزوق بقي