|
رد: ضع همسة ولا تنسَ .. فحبيبك ينتظر ..
شعور سخيف ..
إنك تحس بإن وطنك شيء ضعيف ..
صوتك ضعيف ..
رأيك ضعيف ..
إنك تبيع قلبك وجسمك ..
إنك تبيع قلمك وإسمك ..
ما يجيبوش حق الرغيف .!
سألوا جحا عن سر ضحكه ..
قالك اصل اتنين وشبكوا ..
إللي كان من تحت ميت ..
واللي كان من فوق كفيف ..!!
دا .. شعور سخيف ..
وشعور سخيف ..
إنك تكون رمز الشحاته ..
تبني مبنى للشحاته ..
تعمل وزارة للشحاته ..!
يا ساقية دوري ..
عدي فوقي ودوسي ..
نصبوا عليا وشحتوني فلوسي ..
ربطوني فيكي ..
حتى ما اتغميت ..
هما اللي فرحوا ..
وحدي انا أتغميت ..
أنا اللي صاحب البيت ..
عايش بدون لازمة ..
واما مرة شكيت إدوني بالجزمة ..!!
.. مش لاقي تطفح أديك ..
هاتولنا وجيبولنا ..
هنجيب منين نديك ؟؟!
مش لاقي تطفح آديك ....
طافح يا بلدي غدايا ..
ولوعتي غدايا ..
وادي الأحبة التقوا ..
واتجمعوا عدايا ..
أنا اللي زارعك دهب ..
بتأكليني سباخ ..!!
ما إن كان دا تقل ودلع ..
بزيادة دلعك باخ ..
كرامتنا متهانة ..
واللقمة بإهانة ..
بتخلفينا ليه ..
لما أنت كارهانا ..!!
يعني إيه ..
تبقي أنت هبة النيل يا مصر ..
وكل يوم المية تقطع ..
يعني إيه لما اشتكي غلو الفاتورة ..
يقولوا تشكي ..
بس لازم تدفع ..!!
لما قش الرز ثروة بتتحرق ..
واما نفط الأمة .. ثروة بتتسرق ..
واما جلادك على ولادك بيبطش ..
واما علمك ما يلاقيش ياكل فيطفش ..
يعني إيه ..
نرفع إيدينا بالسلام لجل الغزاة ..
ويعني إيه لما ابقى ماشي في حالي ..
أتشد اشتباه ..؟!
يعني إيه لما اتحبس أربع سنين ..
حبس احتياطي ..
حبس اعتباطي ..
يعني إيه مش حاسة بالعمر وغلاوته ..
بتصبي مر العمر ليه ..
دانا كنت هوهبلك حلاوته ..
انا عمري ما اتأمرت ..
ولا حطيت شروطي ..
ومكان ما ترسى مركبك ..
بابني شطوطي ..
أنا كنت جيشك لما مماليكك باعوكي ..
وكنت يوسف لما عشتي سنين عجاف ..
وضلوعي دي اللي في معركة قادش حموكي ..
وشفايفي دي اللي ما بطلتش ف يوم هتاف ..
أنا كل شبر ف ارضك إتمرمغت فيه ..
وكل يوم عشتيه أنا اتعذبت بيه ..
..............
مع صوت أذانك جرس ..
في الشدة باقينلك ..
من إمتى كانوا الحرس ..
هما اللي باقينلك ؟!
بعتيني علشانهم ..
وعنيكي معصوبة ..
يا هلترى خاينة ..؟!!
ولا زيي مغصوبة ..
كل الكلام إتقال ..
والشعر بقى ماسخ ..
الصبر علو جبال ..
والظلم شيء راسخ ..
.............
كل اللي بيقولك بحبك ..
دول نفاق ..
الحب يعني اتنين بيدوا ..
مش إيد بتبني وستميت تيت تيت يهدوا ..
الحب حالة ..
الحب مش شعر وقوالة ..
الحب يعني براح في قلب العاشقين ..
للمعشوقين ..
يعني الغلابة ينامو في الليل دفيانين ..
الحب يعني جواب لكل المسجونين ..
هما ليه بقو مسجونين ..!
يعني اعيش علشان هدف ..
علشان رسالة ..
يعني احس بقيمتي فيكي ..
إني مش عايش عوالة ..
يعني لما اعرق تكافئيني بعدالة ..
الحب حالة .. الحب مش شعر وقوالة ..
الحب حاجة متتوجدش ف وسط ناس ..
بتجيب غداها من صناديق الزبالة ..
الحب فيكي إستحالة ..
...............................................
...... هشام الجخ .........................
أحد شباب الفيس بوك ....................
|