افرحي يا ام الشهيد
دالنهاردة يوم جديد
حررالأبطال بلادنا
فاتوا من ليلنا العنيد
زرعوا ف الروح الكرامة
شالوا من يومنا الغيامة
من هنا ليوم القيامة
دمهم قناديل تقيد
افرحي يا أم الشهيد
*****
الأدان إعلان زفافه
كبّري وادعي الحبايب
واللي وقت الشدة خافوا
واللي هربان واللي غايب
ابعديهم عن فرحنا
ضعفهم سبّب جروحنا
إبعديهم خلّي روحنا
تعزف الاحلام نشيد
إفرحي يا ام الشهيد
*****
إفرحي وزيدي البشاير
وافردي حضنك أمان
دالعريس ف الجنة طاير
زفّته كات م الميدان
حلمنا كان زي حلمه
حققه هو بدمه
إكتبي ف المجد إسمه
وإعلني ف الأرض عيد
إفرحي يا ام الشهيد