[أبوزيد بيومي]

ظابط أمن الدولة السابق

شعر / أبو زيد بيومي

عضو اتحاد كُتّاب مصر

ظابط أمن الدولة السابق
صِحِي من نومه
حزين وكئيب
كان مش طايق
حتى هدومه
حسّ بيومه ....
صعب رهيب
عنده فراغ
طول ليله و يومه
كان متقريف للتعذيب
بَصّ فْ وشّه
لِقِي نظرات ف عنيه بتحشّه
دابّة ضوافر فيه و تْخُشّه
كان محتاج لحاجات بتْفشّه
بَصّ ف وشّه والتكشيرة
إدّى شرارة العين تأشيرة
هَب و دَبّ ..... و عّلا الصوت
بتكشّر لي يابن ال......... ؟
يسخن ...... يضرب بالشلوت
انطق يابني
ولاّ تموت
يصرخ ..... انطق
يصرخ .... يضرب بالنبّوت
انطق يابن ال ..............
مين ودّاك
مين كان جابك
مين شركاءك
مين أصحابك
مين في الصبح بييجي يزورك
مين في الليل بيخبّط بابك
مين بيموّل
مين بيحوّل في الأخبار
إيه خلاك تطلّع دقنك
إنت مخبّي أكيد أسرار
ليه بتصلي
ليه تتوضاّ
طب ليه تقرا جريدة معارضة
إنت أكيد جوّاك تتمنّى
يصبح كل نظام منهار
لف الظابط لفّة ودار
إيه تفكيرك
إيه تدبيرك
مش راح أقبل زيف تبريرك
مش راح آ خد بالأعذار
قول يا حمار
دار الظابط تاني و لَفّ
بصّ ف وشّه بقرف و تفّ

صنف ما ينفع إلا تعامله
بالإهانات
طب وحياة أمك ياحبيبي
لأخليك على جَمْر تبات
إيده تثبّت تحته خازوق
بالأوجاع و يروح ملزوق
تِشْغِي فيه من تحت لفوق
مرة يسورق ... مرة يفوق
ساعة اتنين و تزيد الحدّة
يصبح كل الضرب بشدة
يملا لسانه بكل سفالة
إيده و رجله فيه شغّالة
يغمى عليه ..........
بعد دقايق ..... يرجع فايق
يرجع تاني لطبعه الرايق
ظابط أمن الدولة السابق
لما بيصحى ف يوم مدّايق
لما يلاقي الجو كئيب
أو متقريف للتعذيب
لو تشتدّ عليه الأزمة
لما يعوز الجرعة اللازمة
يضرب نفسه تلاتين جزمة