[فتيحة الدرابي]

الحق
قلبت اعليه بين لجبال
جاوبتني الصخور الحال هو الحال
قلبت اعليه بين امواج لبحور
موجه تضرب موجه
لبحر هربان ومدعور
سولت عليه النسوان
من الحسرة دموعهم نزلت وديان
سولت عليه الجيران
قالوا لي الحق غاب هاذا ازمان
ضعنا ف المعقول يا إخوان
ضاع معاه الحق وضاع الميزان
باسباب الباطل
عشنا ف شدة
ارضعنا حليب امخلط بالغدة
ارضعناه حيت كان ولا بدة
آش إيدير العود لملجم
والراكب عليه قابط اللجام
وفيه يتحكم
وعليه كل كبيرة وصغيرة إيزمم
وا الباطل
حيد من الطريق
راك اشبعت لحم وابساطل
تاكل ما تشبع
ف حقوق الناس تماطل
ف طريقك الحق ابقى عاطل
شاد قنت ف الدرب
ف الفقر حاصل
اعيا الحق ما يناضل
الباطل هو اللي واصل
لكن الباطل نازل نازل
يطلع حتى يطلع
ويتقلبوا اعليه لمنازل
الحق هو الباق
لكن فين هو
الباطل ما خلاه إيبان
غطى اعليه بالكذوب والبهتان
عامله معاملة الغاب والحيوان
ما خلاه إيهز الراس
كل ما يقرب الحق
من الباطل ويحاول فيه إيعض
إيضربه ضربة إيواطيه مع الأرض
ما يجي فين يجمع قوته
حتى تتلف ليه بلغته
وهكذا على الدوام
الحق والباطل ف لخصام.