[نجلاء سلامه]

إقسمني اتنين..

واجمعني تلات واربع وخميس

واضربني ف جمعة وسبت وحد

ما هو يمكن بعد الضرب بجد

تطرح أيامي شجر ألوان

بفروع فوانيس

والضي النازل م الاوراق

قادر يتغلّب ع الكوابيس

الحلم عريس

وعروسة النيل واقفة حزينة

بتمد الايد

الحب وليد

بس الرافضين

مع كل دقيقة بيبنوا مابين

لتنين متاريس

الفجر الواقف ع الأبواب

متخبي ف قلب غيوم وسحاب

ونهار ما سألت عن الأسباب

كان رده عجيب

قاللي الاجراس مصلوبة خضوع

وادان الحق بيبكي دموع

ع الكعبة واقصاها الموجوع

ووطنا غريب

بدموعي اترجيته يسلم

ويزيح العتمة ويبقى ونيس

قام رد وقال

مش ممكن هدخل وما بينكم

موجود إبليس

...........................