[فتيحة الدرابي]

خطو خطوة يا لوليد وشور
على من جاي تتكبر
هاز راسك وامعفر
جاي تتكبر على من قرٌاك وكببٌر
على من اصبر و صبٌرْ
صغير يا لوليد مهما تكْبرْ
ديرْ عقلك ف راس وفكٌرْ
انت خاوي مهما تعْمرْ
اشكون ارسم لك الخطوات وسطرْ
شكون خاد بيدك
ملي كنت تمشي وتتعثر
شكون اللي على ودك حطم لسوار
اشكون اركب مركب
واخدم على قبلك بحار
نام الليل وبات على قبلك محتار
كيف يحميك من لشرار
شكون قْصد الطبيب والعطار
أو قوٌرْ لفلوس تقْوار
انسيتي اللي احفر الصخر بمنقار
وعلى ودك ودع العزوبية والدوار
قاوم ف الكدية ولوطى وحتى ف لحفار
انسيتي اللي على ودك اخشى يدو ف النار
حرقاتو كمَدها
وقال على ودك كلشي يهون
وذابة جاي تتكبر وبحالك مفتون
عاجبك راسك ونسيتي شكون
فداك بالروح ولعيون.

شرح الكلمات
قور= أوجدها غصبا عنه
شور = بالمهل = وحدة وحدة
دير = ضع
تعمر = تمتلئ
اخشى = أدخل
كمدها = عالجها