[علاء زايد فارس]

طرب بنكهة السيليكون!
بقلم علاء زايد فارس

[align=justify]
باء، حاء، باء ،كاف
بحبك
ألف، نون، ألف،
أنا
بحبك أنا....بحبك أنا......بحبك أناااااا

- لك شو هاد إلي عم تسمعوا يا حمودة ؟؟!
- هي رائعة الفنانة "فرفورة!" يا خالي!
- لك شو فرفورة هي؟؟
دخيلك كل الغنية من أولها لآخرها ثمان حروف وعم تكرر فيهم!

- لا تقول هيك خالو
هي رائعة الشاعر الكبير مرهف الحس!
- شاعر وكبير ومرهف الحس؟؟؟!
إذا كان حسو مرهف ومش قادر يكتب إلا ثمان حروف زهقتهم وإنتا عم تعيد وتزيد فيهم ليل نهار، هدا كيف لو كان حسو معدوم كان كتبلنا شي شيفرة حسابية وقال عنها غنية!

- له يا خالو له
نكدت عليي وأنت عم تسخر من الطرب الأصيل!
طب شو كان بزمنكم طرب غير الأغاني المملة والكئيبة؟؟!

- لك شو بتعرف أنت وجيلك عن الطرب الأصيل؟؟!
لك يا خالو بزمنا كانت الغنية غنية...
كانت تعبر عن وجع الناس وعن أحلامهم الكبيرة!
يا سلااام عأيام زمان وأغاني زمان يا خالو

- طب احكيلي شي مثال يا خالو، شوقتني لأعرف كيف كانت أغانيكم!
- بِتْذَكَّرْ لما كان العالم العربي بتعرض للعدوان
وأمريكا احتلت العراق وأفغانستان
وإسرائيل دمرت غزة ولبنان
والعرب صاروا يقتلوا بعضهم البعض
الدم كان للركب! كان للركب!
طلعت الغنية يا خالو من قلب الوجع
وأبكت الملايييييين!

- ول الملاييييييين!
شو هي يا خالو؟؟

- هي رائعة الفنانة الكبيرة هيفا وهبي "بوس الواوا"

- وشو بتقول الغنية يا خالو؟؟ شوقتني
- بتقول:
ليك الواوا
بوس الواوا
خلي الواوا يصح!
لما بست الواوا
شلته
صار الواوا بح!

- كلمات رائعة وجميلة
يا سلام يا خالو، لهي الدرجة كانت الواوا منتشرة بأيامكم؟؟!

- أي صدقني يا خالو
وهالفنانة ما سكتت بنوب بنوووب
أفنت عمرها وزهرة شبابها وهي عم تنصر العروبة
الأعداء يزرعوا الواوا
وهي عم تبوسها....
لما صار معها ترهل بالشفايف!

- ول ترهل مرة واحدة؟؟!

- ضحت بشفايفها لك خالو
وعملولها عملية عبوهن سيلكون لخاطر عيون هالأمة العربية تعيش بحرية وكرامة!
ولولاها
لولاها
- قول والله زهقتني
- معلش علق السي دي!
ولولاها ...
ما كانت هالفرفورة إلي عم تسمعلها بتغني بأمن وأمان!
ومرهف البس هدا بكتب شعر

- مرهف الحِسْ
- مرهف الحِسْ، الخَسْ مانو مهم ولاك خالو!

- طب خالو شوقتني أعرف كمان عن أغاني زمان..

- يا خالو شو بدي أحكيلك تااحكيلك
سمعت بالفنانة العظيمة روبي...!
- لا ما سمعت!
- يا جاهل يا عديم الثقافة مضيع وقتك وانتا عم تسمع لفرفورة خانو وما بتعرف شي عن الطرب الأصيل!
- يا خالوا دخيلك احكيلي عن هالروبي شوقتني ....

- هي أول مطربة عربية بتغني وهي عم تلعب رياضة!
صارت قدوة لكل الشباب والمراهقين...
وكتير شباب كان مضيع وقته عالكتب العلمية والكلام الفاضي صار شعارو
" العقل السليم في الرقص السليم!"

- ول لهي الدرجة؟؟!
- ايه والله يا خالو واكتر كمان...
ولك روبي هي، هي أول من قالت لا بالعالم العربي!
الي كان يقول لا بزمنا كانوا يقطعولوا لسانه

- وهي قالت لا؟؟
- إيه يا حمودة قالت لا...
ما سمعت غنيتها...
" كل ما أقولوا آه يقولي هو لا، يجرحني وأقولو آه ، يقولي هو لا، لا لا لا"
- بس يا خالو هو الي عم يقول "لا" مش هيي
- يعدمني ياك شو غبي!
مش هوّا وهيّي بيحبوا بعض؟؟!
- إيه!
- يبقى ما فرقت ، هوّا وهيِّ واحد!
- آه ...اممم...معك حق ما فرقت...
- حبيبي حموده
ولك هي روبي افتخرت ذات يوم قدام وسائل الإعلام إن جسمها طبيعي 100%!
- شو يعني طبيعي 100%
- يعني خالي من السيليكون!
هي قدوة يا خالو
قدوة!
وإذا سمعت بالكاتبة الكبيرة "أحلام مستغانمي" الي كانت عأيامنا، تساءلت مرة بمقالها" من الأهم مؤخرة روبي أم مقدمة ابن خلدون؟؟" بيقارنوها بابن خلدون يا خالو، بزمنكم هد فرافيرو وأخواتها كلهن سيليكون بسيليكون!
- كيف عرفتها هي يا خالو...
- شو الي عرفتو؟؟
- هي الغنية الجديدة للمطربة نوجة "سيليكون سيليكون"!
- وشو بتقول هي الغنية؟ ، بس وينك؟؟
لا تقول لحدا إني سألتك...!
- المطربة كانت كئيبة بالكليب..
- كئيبة؟؟!!!
- ما تقلق خالي كانت كئيبة وهي عم ترقص
- ما دامها بترقص يبقى احنا بالسليم..قول ولاك قول
- وبالكليب صورتها وهي بالعمليات وهي بتغني لحبيبها:
عشانك صرت مخلوق تاني
صرت كلي سيلكون يا حبيبي
طلعت من هون
لقيتك بتخون!
قلبك صار سيليكون يا حبيبي!

- ولك وين بيبثوا هالغنية؟؟؟
- على ميلودي سيليكون!
مش حتقدر تغمض عينيك :-)

- وشو ترددها؟؟
-2345 أفقي ...1512 عمودي
- لك حبيبو لخالك أنت
اسمع لنوجة يا خالو هي سفيرة الطرب الأصيل بالعالم العربي
واترك هالفرفورة الي عم تنوص متل جاجة ورطانه وهي عم بتبيض!
[/align]



م.علاء زايد فارس
18/3/2012م
أهديكم أغنية فلة " أهل المغنى!"
http://www.youtube.com/watch?v=OX8EyZxmmsE