[فتيحة الدرابي]

عايش بسبع وجوه
عندو شي اعقل ولا معتوه
اللي تبعو ف الطريق إيتوه
النفاق ولبهوت
يتحكم ف السروت
يحبك الكذبة إيفرق الخوت
يتقلب على كرشو وقفاه
السنطيحة امعاوناه
طالع نازل واكل
إيشبك لخيوط إيخليك واحل
عندو كيف ارباح كيف لخسارة
الرابح عندو معاه النص ف الشكارة
والخاسر جابو الله
دارو ف الكرش كي لكعارة
إيعمر عليه السوارج
إيدور بيه الشفارة
ما يفرقو حتى يزيدو خسارة على اخسارة
ديما موجود ما يتقاضى
ف راس الدرب واقف
إيودع هذا
ويقول لهذاك الراض
حتى حاجة ما تفلت
حاضي المارة
عينيه ما يرمشو
واخة تدق فيهم ارصاصة
بلية التبلى بيها
معاها محال يتفاك
شيطان ف صفت ابنادم احداك
موجود يدخل حتى ف لعراك
عامل نفسو إيفك
وهو إيزيد ف لحطب من وراك
هذا مول سبع اوجوه
طبعو اصعيب
إلى عرفتيه فرقو قبل ما عقلك إيغيب
ما فيه فايدة ما معاه ارباح
ما هو مول الفران ما هو الطراح
امعمر السوق غير بلمزاح
إلى افرقتيه ف حياتك ترتاح.