حبيبة قلبي استاذة سلوى
معك حق المواضيع مش ملحقين عليها وأنا في مواضيع كنت حابة التعليق
عليها بس طارت بالهواء ... مش مهم ... حبيبتي الأفكار كلها موجودة
وبأي وقت بنطول أي فكرة وبنعلق عليها ... لكن اذا الفكرة طارت من راسي
يمكن صعب نلاقيها وبيني وبينك أنا بكتب حتى أفش خلقي فكيف بدي استنى .
استاذة نصيرة احضرينا موضوعنا اليوم
الإحتياج
ماهو الاحتياج ؟؟؟؟
هل الأحتياج بيكون لأشخاص فقط ؟
مين هم هادول الأشخاص اللي احنا بنحتاجهم ؟
شو هي مواصفاتهم ؟؟
هل هم موجودين على أرض الواقع أم بيرفرفوا في سماء الخيال ؟
هل الأحتياج عاطفي ؟ مادي ؟ معنوي ؟
هل نحتاج غير الأشخاص ؟
هذه حكايتي مع العصافير شو هي ؟؟؟
أنا بكره العصافير والنباتات اللي في البيت ،، لأنها من وجهة نظري بتعمل فوضى
وبتحتاج لجهد كبير في العناية بها وانا ما عندي وقت .. ممنوع دخول العصافير البيت
هذا قرار تكسر العام عندما دخل زوجي حامل قفص فيه عصفورين للحب
قلت شو هذا قال فرح بدها اياهم وفرح قالت اه يا ماما خليهم وهو قال انا بدير بالي عليهم
هيهم هون وما تمسكيهم انا بعمل كل شيء وحمل حاله ومشي وترك لي اياهم
رميتهم على جنب وتاني يوم بدي أنظف القفص حاولت افتح باب القفص لكن أنا بخاف
من كل شيء بيتحرك أو بيزحف أو بيطير أو بيأتي بأي حركة مفاجئة ابتداء من النملة
وانتهاء بالعصفور ومرورا في اللي ما يتمسوش الصراصير
مديت ايدي في القفص خافوا طاروا انا خفت صرخت ما في حدا ... كررت المحاولة وبعد جهد
نظفت القفص وعلى هالحالة كم يوم والعصافير ما الهم حس ؟ شو هالعصافير الخرس هادول ؟
أخدت العصافير معي على غرفة التلفزيون يتسلوا وبعد شوي بلشوا يغردوا وبعدين بطلوا
يسكتوا فرحت عليهم فقمت عملت الهم أغصان جوه القفص وصاروا يلعبوا وبعدين جبت
الهم بزر العصافير الي مملح والهم سادة وصاروا ياكلوا ويشاغبوا وبعدين صرت أحط القفص
بجانبي وأمد ايدي واحط لهم بزر من صحني ويجي ياكلوا من ايدي وبعدين صرت أنظف القفص
وأحممه ولا هم يخافوا ولا أنا أخاف وصرت انا والعصافير ما نفترق وبلشت الغيرة في البيت
الكل يضوج من علاقتي بالعصافير وزوجي يقول ليش بياكلوا من ايدك وليش بيغردوا لما يشوفوك
وبناتي كل شوي احسبينا العصافير وما عدت عارفة شو أعمل ولكن كنت أعشقهم .
يوم ذهبت لزيارة الطبيبة قالت لي ودقت على صدرها عندك طيور بالبيت ؟ وكان زوجي فتن لها
قالت لا لا لا فورا يطلعوا من البيت وحتى نطمئن عليك اعملي التحاليل هذه .
العصر وقبل ما تطلع نتائج التحاليل إجى زوجي وحمل القفص وقال لي انا شفت
واحد راح يدير باله عليهم أكثر منك هاتيهم وما تخافي وأخذهم أنا أجهش بالبكاء
وكنت ساعتها منظفتهم وحاطة لهم اكل جديد وأعطيته بقية الأكل وكل البيت كان متأثر
على فراق العصافير وكل اليوم الصبح أنزل حتى اشوفهم واتذكر بعدين انهم مش هون
وطلعت النتائج وما في شيء وترجيت زوجي نرجعهم وهو يقول لا خطر .. طيب خدني اشوفهم
يقول خلص انسيهم وما قدرت لليوم انساهم .
هم عصافير لكن حبيتهم وتعودت عليهم وشغلوني وعبوا وقتي كله .
ونلتقي ..